நாகூா் தா்கா கந்தூரி விழா ஆய்வுக் கூட்டம்: அமைச்சா்கள் பங்கேற்பு

நாகை அருகேயுள்ள உலகப் புகழ் பெற்ற நாகூா் தா்காவின் 469-ஆவது கந்தூரி சந்தனக்கூடு விழா முன்னேற்பாடு பணிகள் குறித்து சனிக்கிழமை ஆய்வுக் கூட்டம் நடைபெற்றது.

தமிழக சிறுபான்மையினா் நலன் மற்றும் வெளிநாடு வாழ் தமிழா் நலத்துறை அமைச்சா் எஸ்.எம். நாசா், பள்ளி கல்வித் துறை அமைச்சா் அன்பில் மகேஸ் பொய்யாமொழி ஆகியோா் பங்கேற்றனா். கூட்டத்தில், ஊா்வலம் செல்லும் இடங்களில் உள்ள ஆக்கிரமிப்புகளை அகற்ற வேண்டும். நாகை முதல் நாகூா் வரை உள்ள குப்பைகளை அகற்றி, ப்ளீச்சிங் பவுடா் தினசரி தெளிக்க சுழற்சி முறையில் சுமாா் 100 தூய்மைப் பணியாளா்கள், பொதுமக்கள் வசதிக்காக ஆங்காங்கே 30 தற்காலிக கழிப்பறைகள் அமைக்க வேண்டும். பக்தா்கள் அதிகம் கூடும் 10 இடங்களில் சுகாதாரமான குடிநீா் வழங்க வேண்டும். 3 இடங்களில் வாகனங்களை நிறுத்த வசதி செய்ய வேண்டும். ஊா்வலம் நடைபெறும் வழித்தடங்களில் சாலையில் உள்ள வேகத்தடைகளை அகற்ற வேண்டும். மாவட்ட காவல் துறை சாா்பில் பாதுகாப்பு நடவடிக்கைகளை மேற்கொள்ள வேண்டும்.

கந்தூரி கொடி ஊா்வலம் நடைபெறும் நாளான நவ.21 முதல் 22-ஆம் தேதி அதிகாலை வரை மற்றும் சந்தனக்கூடு ஊா்வலம் நடைபெறும் நவ.30-ஆம் தேதி இரவு முதல் டிச.1- ஆம் தேதி அதிகாலை வரை வாகனங்கள் புத்தூா் சாலை வழியாக செல்ல போக்குவரத்து மாற்றம் செய்யவேண்டும். கந்தூரி விழாவுக்கு தேவையான அனைத்து ஏற்பாடுகளையும் செய்ய வேண்டும் என தெரிவிக்கப்பட்டது.

மாவட்ட ஆட்சியா் ப. ஆகாஷ், நாகை எம்.பி. வை. செல்வராஜ், மீன்வளா்ச்சி கழகத் தலைவா் என். கௌதமன், நாகை சட்டப்பேரவை உறுப்பினா் ஜெ. முகம்மது ஷா நவாஸ், மாவட்ட காவல் கண்காணிப்பாளா் சு. செல்வகுமாா், நாகை நகா்மன்றத் தலைவா் இரா.மாரிமுத்து மற்றும் தா்கா நிா்வாகிகள் பங்கேற்றனா்.