வாய்க்கால்கள் தூர்வாரக் கோரி விவசாயிகள் சாலை மறியல்

குடவாசல் அருகே வாய்க்கால்களை தூர்வார வலியுறுத்தி பொதுமக்கள், விவசாயிகள் புதன்கிழமை சாலை மறியலில் ஈடுபட்டதால் அப்பகுதியில் ஒரு மணி நேரம் போக்குவரத்து பாதிக்கப்பட்டது. 
குடவாசல் அருகேயுள்ள அரசவணங்காடு, செம்மங்குடி, தீபங்குடி, உள்ளிட்ட ஊர்களில் உள்ள வாய்க்கால்கள் தூர்வார வேண்டும், செம்மங்குடி-அரசவணங்காடு (செட்டியார்காடு) சாலை பணியை உடனடியாக தொடங்க வேண்டும், அரசவணங்காடு பகுதியில் அடிக்கடி விபத்து ஏற்பட்டு வருவதால், அங்குள்ள ஆரம்ப சுகாதர நிலையம் எதிரில் சாலையின் குறுக்கே வேகத்தடை அமைக்க வேண்டும் உள்ளிட்ட கோரிக்கைகளை வலியுறுத்தி, அரசவணங்காடு, செம்மங்குடி, தீபங்குடி ஆகிய கிராமங்களைச் சேர்ந்த பொதுமக்கள், விவசாயிகள், விவசாயத் தொழிலாளர்கள் அரசவணங்காடு ஆரம்ப சுகாதார நிலையம் எதிரில் திருவாரூர்-கும்பகோணம் சாலையில் மறியலில் ஈடுபட்டனர். 
தகவலறிந்து அங்கு சென்ற குடவாசல் போலீஸார் மறியலில் ஈடுபட்டவர்களிடம் நடத்திய சுமுகப் பேச்சுவார்த்தையில் உடன்பாடு ஏற்படாததையடுத்து, திருவாரூர் வட்டாட்சியர் குணசீலி மற்றும் வருவாய்த் துறை அலுவலர்கள் பேச்சுவார்த்தையில் ஈடுபட்டு, கோரிக்கை மீது ஒரு வாரத்தில் நடவடிக்கை மேற்கொள்ளப்படும் என்று உறுதியளித்தனர். 
இதையடுத்து, மறியல் விலக்கிக்கொள்ளப்பட்டது. இந்த சாலை மறியலால் சுமார் ஒரு மணி நேரம் போக்குவரத்து பாதிக்கப்பட்டது. மறியலில் தமிழ்நாடு விவசாயிகள் நலச் சங்கத் தலைவர் சேதுராமன், செயலர் ராமமூர்த்தி, மாவட்டத் தலைவர் கலைமணி உள்ளிட்டோர் பங்கேற்றனர்.