மதுபானக் கடையை மூடக் கோரி சாலை மறியல்

திருவாரூர் அருகே மதுபானக் கடை திறப்பதை கண்டித்து பொது மக்கள் புதன்கிழமை சாலை மறியலில் ஈடுபட்டனர். 
திருவாரூர் அருகேயுள்ள ராதாநஞ்சை கிராமத்தில் அரசு மதுபானக் கடை ஏற்கெனவே திறக்கப்பட்டு, அதற்கு அப்பகுதி மக்கள்  எதிர்ப்பு தெரிவித்து போராட்டங்கள் நடத்தியதைத் தொடர்ந்து கடை மூடப்பட்டது.
இந்நிலையில், மூடப்பட்ட கடை மீண்டும் திறக்க முயற்சி நடப்பதை அறிந்த மக்கள் கடையை திறக்க வேண்டாம் என கோரிக்கை விடுத்திருந்தனர். இருப்பினும், அப்பகுதியில் புதன்கிழமை மதுபானக் கடை திறக்கப்பட்டு மதுவிற்பனை தொடங்கியது. 
இதையறிந்த பகுதி மக்கள் கடையை மூட வலியுறுத்தி ராதாநஞ்சை கடைவீதியில் சாலை மறியல் போராட்டத்தில் ஈடுபட்டனர். 
இதனால், திருவாரூர் - திருத்துறைப்பூண்டி சாலையில் போக்குவரத்து பாதிப்பு ஏற்பட்டது. இதுகுறித்து, தகவலறிந்த காவல் துறையினர் மற்றும் டாஸ்மாக் அலுவலர்கள் சம்பவ இடத்துக்கு வந்து மதுபான கடை இனி திறக்கப்படாது என உறுதியளித்து எழுதி கொடுத்தனர். இதையடுத்து, சாலை மறியல் விலக்கிக்கொள்ளப்பட்டது.