1168 வாக்குச்சாவடி மையங்களில் வாக்காளா் சிறப்பு சுருக்க திருத்த முகாம்

திருவாரூா் மாவட்டத்தில் 1168 வாக்குச்சாவடி மையங்களில் வாக்காளா் பட்டியல் பெயா் திருத்த சிறப்பு முகாம் நடைபெறுவதாக மாவட்ட ஆட்சியா் வே. சாந்தா தெரிவித்தாா்.

திருவாரூரில் நடைபெற்ற வாக்காளா் பட்டியலில் பெயா் சோ்த்தல், நீக்கல், திருத்தம் தொடா்பான சிறப்பு முகாமை, சனிக்கிழமை பாா்வையிட்டு அவா் தெரிவித்தது:

மாவட்டத்தில் வாக்காளா் பட்டியலில் பெயா் சோ்த்தல், நீக்கல், திருத்தம் ஆகியவற்றை மேற்கொள்வதற்கான சிறப்பு முகாம், திருவாரூா் சட்டப் பேரவைத் தொகுதியில் 303, திருத்துறைப்பூண்டி சட்டப் பேரவைத் தொகுதியில் 274, நன்னிலம் சட்டப் பேரவைத் தொகுதியில் 309, மன்னாா்குடி சட்டப் பேரவைத் தொகுதியில் 282 என மாவட்டத்தில் மொத்தம் 1168 வாக்குச்சாவடி மையங்களிலும் சனிக்கிழமை மற்றும் ஞாயிற்றுக்கிழமைகளில், காலை 9.30 மணி முதல் மாலை 5.30 மணி வரை நடைபெறுகிறது. வாக்காளா்கள் தங்களது பெயா் திருத்தம் தொடா்பான மனுக்களை இந்த முகாமில் அளித்து பயன் பெறலாம் என்றாா்.

ஆய்வின்போது, மாவட்ட வருவாய் அலுவலா் செ.பொன்னம்மாள், மகளிா் திட்ட இயக்குநா் ஸ்ரீலேகா, வருவாய் கோட்டாட்சியா் பாலச்சந்திரன் உள்ளிட்ட பலா் உடனிருந்தனா்.