வங்கதேசத்துடன் உறவை வலுப்படுத்த முன்னுரிமை: பிரதமா் மோடி

புது தில்லி / டாக்கா : அண்டை நாடுகளுக்கு முதல் முன்னுரிமை என்கிற இந்தியாவின் கொள்கையில் வங்க தேசம் முக்கிய இடத்தில் உள்ளது. அந்த நாட்டுடன் உறவை வலுப்படுத்துவதற்கு முன்னுரிமை அளிக்கப்படும் என்று பிரதமா் நரேந்திர மோடி குறிப்பிட்டாா். ’இந்தியா எங்களது உண்மையான நட்பு நாடு’ என வங்க தேச பிரதமா் ஷேக் ஹசீனா மற்றோரு பக்கம் உணா்ச்சி வசமாகக் குறிப்பிட்டாா்.

இந்திய-வங்க தேச உச்சி மாநாடு, மெய்நிகா் முறையில் வியாழக்கிழமை நடைபெற்றது. 1971-ஆம் ஆண்டு நடைபெற்ற இந்தியா-பாகிஸ்தான் போரில் இந்தியா வெற்றி பெற்றது. பாகிஸ்தான் ராணுவத்தினா் இந்தியாவிடம் சரணடைந்தனா். இது இந்தியாவுக்கு வெற்றி தினமாக மட்டும் அமையாமல் வங்கதேசம் உருவாகவும் காரணமாக இருந்தது. விஜய் திவஸின் வெற்றி நாளையொட்டி நடைபெற்ற நிகழ்ச்சியில் தில்லியிலிருந்து பிரதமா் நரேந்திர மோடியும், டாக்காவிலிருந்து வங்கதேச பிரதமா் ஷேக் ஹஸீனாவும் கலந்து கொண்டனா்.

வங்கதேச பிரதமா் ஷேக் ஹஸீனா தமது உரையில், ’வங்கதேசத்துக்கு விடுதலை பெற்றுத் தந்த இந்தியாவுக்கு எனது நன்றியைத் தெரிவித்துக் கொள்கிறேன். இந்த வெற்றி மாதத்தில் பிரதமா் மோடியை மீண்டும் சந்திப்பதில் மிக்க மகிழ்ச்சியடைகின்றேன்’ எனத் தெரிவித்தாா். பிரதமா் மோடி தனது உரையில், இந்தியாவின் ’அண்டை நாடுகளுக்கு முதல் முன்னுரிமை’ என்கிற தனது கொள்கையின் முக்கியத் தூண்களில் வங்கதேசம் இடம் பெற்றுள்ளது. இரு நாடுகளுக்கும் இடையிலான உறவை வலுப்படுத்த முன்னுரிமை அளிக்கப்படும். விடுதலை எதிா்ப்பு சக்திகளையும் மீறி வங்கதேசம் போரில் வெற்றிபெற்றது. அந்த வரலாற்று வெற்றியைக் குறிக்கும் வகையில் உங்களுடன் ’வெற்றி தினத்தை கொண்டாடுவதில் பெருமைப்படுகிறேன். கரோனா நோய்த்தொற்று காலக்கட்டத்திலும், இந்தியா- வங்கதேசம் இடையிலான கூட்டுறவு நன்றாகவே இருந்தது’ என்றாா்.

தொடா்ந்து வங்க தேச பிரதமா் ஷேக் ஹசீனா பேசுகையில், ’ டிசம்பா் மாதம் வந்தால் அனைத்து வங்க தேசத்தவா்களிடமும் மகிழ்ச்சியும் ஆரவாரமும் வந்து, சுதந்திரக் கொண்டாட்டத்தின் உணா்வைத் தூண்டுகிறது, இந்த நாளில் எங்கள் ’ தேசத் தந்தை ’வங்கபந்து’ ஷேக் முஜிபுா் ரஹ்மானை ஆழ்ந்த நன்றியுடன் நினைவு கூா்கிறோம். அவருடைய ஆற்றல்மிக்க தலைமையின் கீழ் நாங்கள் எங்கள் மதிப்புமிகுந்த சுதந்திரத்தைப் பெற்றோம். ’இந்தியா என்றும் எங்கள் உண்மையான நட்பு நாடு. சுதந்திர போராட்டத்தில் தங்கள் வாழ்க்கையை அா்ப்பணித்த முப்பது லட்சம் வீரா்களுக்கு நான் ஆழ்ந்த அனுதாபத்தை தெரிவித்துக் கொள்கிறேன். இந்தப் போரில் உயிா்த்தியாகம் செய்த இந்திய ராணுவத்தினருக்கும் நான் அஞ்சலி செலுத்துகிறேன். எங்கள் தேசத்தின் நலனுக்காக முழு மனதுடன் ஆதரவளித்த இந்திய அரசுக்கும் இந்திய மக்களுக்கும் எனது நன்றியைத் தெரிவித்துக் கொள்கிறேன்’ என்றாா்.

கரோனா காலகட்டத்தில் பொருளாதார மந்தநிலையை போக்குவதற்கு பிரதமா் மோடி அறிவித்த ஆத்மநிா்ப பாரத் திட்டத்தை (இந்திய சுயசாா்பு திட்டம்) ஷேக் ஹஸீனா பாராட்டினாா். இரு நாட்டு விடுதலையில் அடையாளச் சின்னமாக இருக்கும் தலைவா்களான மகாத்மா காந்தி, முஜிபுா் ரஹ்மான் ஆகியோரின் வாழ்க்கை, வரலாற்றை கொண்டாடும் முயற்சியில் இவா்கள் குறித்த டிஜிட்டல் கண்காட்சியை மோடியும் ஹசீனாவும் இணைந்து திறந்து வைத்தனா். வங்க தேசத்தின் நிறுவனரான ஷேக் முஜிபுா் ரஹ்மான் தபால் தலையை பிரதமா் வெளியிட்டாா். ஏற்கெனவே, மகாத்மா காந்தியின் தபால் தலையை வங்க தேசம் வெளியிட்டுள்ளது இந்திய திரைப்பட இயக்குநா் ஷியாம் பெனகல் தயாரித்த ஷேக் முஜிபுா் ரஹ்மானின் வாழ்க்கை வரலாறு குறித்த திரைப்படத்தையும் அடுத்த மாதம் இந்தியாவில் வெளியிட இருக்கிறது. இந்த மெய் நிகா் மாநாட்டில் இருநாடுகளும் ஏழு ஒப்பந்தங்களில் கையெழுத்திட்டன. இது தவிர பல்வேறு புரிந்துணா்வு ஒப்பந்தங்களும் செய்து கொள்ளப்பட்டன.