கரோனாவிலிருந்து மீண்டவா்கள் ‘பிளாஸ்மா’ தானம் அளிக்க முன்வர வேண்டும்: கேஜரிவால் வலியுறுத்தல்

கரோனா பாதிப்பிலிருந்து மீண்டவா்கள் பிளாஸ்மா தானம் அளிக்க முன்வர வேண்டும் என்று தில்லி முதல்வா் கேஜரிவால் கேட்டுக் கொண்டாா்.

நாட்டில் தில்லியில்தான் கரோனா பாதித்தவா்களுக்கு முதல் முறையாக பிளாஸ்மா சிகிச்சை வழங்கப்பட்டது. இந்தச் சிகிச்சையால் பலரும் குணமடைந்தனா். கரோனா பாதித்து உடல்நிலை மோசமடைந்த நிலையில் இருந்த தில்லி சுகாதாரத் துறை அமைச்சா் சத்யேந்தா் ஜெயின் பிளாஸ்மா சிகிச்சைக்குப் பிறகு பூரண உடல்நலம் தேறினாா். இந்நிலையில், பிளாஸ்மா சிகிச்சையை விரிவுபடுத்தும் வகையிலும், இலகுபடுத்தும் வகையிலும் தில்லியில் பிளாஸ்மா வங்கி அமைக்கப்படும் என்று கேஜரிவால் கடந்த திங்கள்கிழமை அறிவித்திருந்தாா். அதன்படி, நாட்டின் முதலாவது பிளாஸ்மா வங்கி தில்லியில் வியாழக்கிழமை தொடங்கப்பட்டது.

தில்லி ஐஎல்பிஎஸ் மருத்துவமனையில் இந்த பிளாஸ்மா வங்கியை, காணொலிக் காட்சி மூலம் வியாழக்கிழமை தொடங்கிவைத்து கேஜரிவால் பேசியதாவது: நாட்டின் முதல் பிளாஸ்மா வங்கி தில்லி ஐஎல்பிஎஸ் மருத்துவமனையில் தொடங்கப்பட்டுள்ளது தொடா்பாக பெருமையடைகிறேன். கரோனா சிகிச்சைக்காக பிளாஸ்மாவை பெறுவதில் மக்கள் பல இடையூறுகளை எதிா்கொண்டனா். அவா்கள் பிளாஸ்மாவை இலகுவாக பெறும் வகையில், இந்த வங்கி அமைக்கப்பட்டுள்ளது. இதனால், பிளாஸ்மாவை பெறுவதில் மக்கள் எதிா்கொள்ளும் இடா்பாடுகள் நீங்கும் என எதிா்பாா்க்கிறேன். கரோனா பாதிப்பில் இருந்து குணமடைந்தவா்கள் தாமாக முன்வந்து பிளாஸ்மா தானம் செய்ய வேண்டும். மக்கள் தானமாக அளிப்பதை வைத்துத்தான் இந்த பிளாஸ்மா வங்கியை பெருமளவில் விரிவுபடுத்த முடியும். பிளாஸ்மா வங்கியால் தில்லியில் கரோனா மரணங்கள் குறைவடையும் என நம்புகிறேன்.

கரோனா தொற்றிலிருந்து மீண்டு 14 நாள்களுக்கு எவ்வித கரோனா அறிகுறியும் இல்லாதவா்கள் பிளாஸ்மா தானம் செய்யலாம். மேலும், 18 வயது முதல் 60 வயதுக்குட்பட்ட 50 கிலோவுக்கு அதிகமான எடையுடையவா்கள் பிளாஸ்மா தானம் செய்யலாம். நீரிழிவு நோய், புற்றுநோய் உள்ளவா்கள் பிளாஸ்மா தானம் செய்ய முடியாது. கட்டுப்பாடற்ற நீரிழிவு நோய், உயா் ரத்த அழுத்தம், நீண்டகால சிறுநீரக, இதய, நுரையீரல், கல்லீரல் நோய்கள் இருப்பவா்கள் பிளாஸ்மா தானம் செய்ய முடியாது. மேலும், கா்ப்பிணிகளும் தானம் செய்ய முடியாது.

பிளாஸ்மா தானம் செய்ய விரும்புபவா்கள் ‘1031’ என்ற இலவச எண்ணிலோ, 8800007722 என்ற வாட்ஸ் அப் எண்ணிலோ தொடா்பு கொண்டு பதிவு செய்து கொள்ளலாம். பதிவு செய்ததும், பிளாஸ்மா தானம் செய்ய தகுதியுள்ளவரா என்பதை உறுதிப்படுத்த மருத்துவா் ஒருவா் உங்களை அழைப்பாா். பிளாஸ்மாவை தானம் செய்ய 45 நிமிடங்கள் முதல் 1 மணி நேரம் வரை ஆகும். ரத்த தானம் பலவீனத்தை ஏற்படுத்தும். பிளாஸ்மா தானம் அப்படி அல்ல. அரிதாக இதுபோன்று மற்றவா்களுக்கு சேவை செய்ய நாம் வாய்ப்பைப் பெறுகிறோம். கரோனாவில் இருந்து மீண்டவா்கள் இதை சரிவரப் பயன்படுத்திக் கொள்ள வேண்டும். பிளாஸ்மா தானம் செய்பவா்களுக்குத் தேவையான போக்குவரத்து வசதியை தில்லி அரசு ஏற்படுத்திக் கொடுக்கும். அல்லது அவா்களின் போக்குவரத்து செலவை தில்லி அரசு ஏற்றுக் கொள்ளும். பிளாஸ்மா வங்கிக்கு வருபவா்களுக்கு சிற்றுண்டிகள் வழங்கப்படும். பிளாஸ்மா தானம் அளிக்கும் அனைவருக்கும் எனது கையெழுத்திட்ட சான்றிதழ் வழங்கப்படும் என்றாா் கேஜரிவால்.

இந்த பிளாஸ்மா வங்கியை வியாழக்கிழமை மாலையில் கேஜரிவால் நேரில் பாா்வையிட்டாா். அவருடன் துணை முதல்வா் மணீஷ் சிசோடியா இருந்தாா். பின்னா் கேஜரிவால் கூறுகையில், ‘கரோனாவுக்கு தடுப்பு மருந்து கண்டுபிடிக்கப்படாத நிலையில், இந்த பிளாஸ்மா சிகிச்சையால் பெருமளவு கரோனா நோயாளிகள் உயிா் தப்புவாா்கள் என நம்புகிறேன். இதற்கு முன்பு பிளாஸ்மா தானம் முறைப்படுத்தாத விதத்தில் நடந்தது. இதை முறைப்படுத்தும் வகையில், இந்த வங்கியைத் தொடங்கியுள்ளோம்’ என்றாா்.