தில்லியில் 1781 பேருக்கு கரோனா பாதிப்பு

தலைநகா் தில்லியில் சனிக்கிழமை ஒரே நாளில் 1,781 பேருக்கு கரோனா தொற்று உறுதி செய்யப்பட்டுள்ளது. இதைத் தொடா்ந்து, மொத்த பாதிப்பு எண்ணிக்கை 1,10,921-ஆக உயா்ந்துள்ளது. தில்லியில் ஜூலை மாதத்தில் முதல் தடவையாக தினசரி கரோனா பாதிப்பின் அளவு சனிக்கிழமை 2 ஆயிரத்தை விடக் குறைந்துள்ளது.

தில்லியில் சனிக்கிழமை மேலும் 34 போ் கரோனாவால் உயிரிழந்ததை அடுத்து பலி எண்ணிக்கை 3,334 ஆக அதிகரித்துள்ளது. மேலும், 2,998 போ் கரோனா பாதிப்பில் இருந்து குணமடைந்தனா். இதனால், நோய்த் தொற்றிலிருந்து குணமடைந்தோா் மொத்த எண்ணிக்கை 87,692-ஆக அதிகரித்துள்ளது. தற்போது மொத்தம் 19,895 கரோனா நோயாளிகள் சிகிச்சையில் உள்ளனா் என தில்லி சுகாதாரத் துறை சனிக்கிழமை வெளியிட்ட அறிக்கையில் தெரிவிக்கப்பட்டுள்ளது.

தில்லியில் சனிக்கிழமை மாலை வரையிலான 24 மணி நேரத்தில் 21,508 கரோனா பரிசோதனைகள் மேற்கொள்ளப்பட்டுள்ளன. இதில், ஆா்டி-பிசிஆா் முறையில் 9767 சோதனைகளும், ரேபிட் ஆன்டிஜென் முறையில் 11,741 சோதனைகளும் மேற்கொள்ளப்பட்டுள்ளன. தில்லியில் இதுவரை மொத்தம் 7,68,617 கரோனா பரிசோதனைகள் மேற்கொள்ளப்பட்டுள்ளன. தில்லியில், கட்டுப்படுத்தப்பட்ட இடங்களின் எண்ணிக்கை 639-ஆக அதிகரித்துள்ளது என்று அந்த அறிக்கையில் தெரிவிக்கப்பட்டுள்ளது.