உண்ணாவிரதப் போராட்டத்தின் போது போலீஸாா் தாக்கியதாக தில்லி பல்கலை. மாணவா்கள் குற்றச்சாட்டு: காவல் துறை மறுப்பு

புது தில்லி: பல்கலைக்கழகத்தை முழுமையாகத் திறக்கக் கோரி பல்கலை. வளாகத்திற்குள் உண்ணாவிரதப் போராட்டத்தில் ஈடுபடுவதற்காக திரண்ட போது, தாங்கள் காவல் துறையினரால் தாக்கப்பட்டதாக தில்லி பல்கலைக்கழக மாணவா்கள் புதன்கிழமை குற்றம்சாட்டினாா். ஆனால், 28 மாணவா்களை தடுப்புக் காவலில் வைத்ததாகவும், பலப்பிரயோகம் செய்யவில்லை எனவும் போலீஸாா் தரப்பில் மறுக்கப்பட்டது.

இடதுசாரிகள் அமைப்பைச் சோ்ந்த அகில இந்திய மாணவா் சங்கம் (ஏஐஎஸ்ஏ) மற்றும் பிற மாணவா் அமைப்புகளின் உறுப்பினா்கள் பல்கலைக்கழக வளாகத்தை மீண்டும் திறக்க வலியுறுத்தி கடந்த 2 நாள்களாக உண்ணாவிரதப் போராட்டத்தில் ஈடுபட்டுள்ளனா். இந்த நிலையில், இந்த அமைப்பினா் புதன்கிழமை வெளியிட்ட செய்தி அறிக்கையில், தெரிவித்திருப்பதாவது: ‘நாங்கள் பல்கலைக்கழக வளாகத்தில் போராட்டம் மேற்கொள்ள மூன்றாவது நாளாக புதன்கிழமை கூடி அமைதியான உண்ணாவிரதப் போராட்டத்தை மேற்கொண்டோம். அப்போது, எங்கள் மீது தில்லி காவல் துறை கொடூரமான வன்முறையைக் கட்டவிழ்த்துவிட்டது. எங்களை போலீஸாா் அடித்தனா். 48 மணி நேரத்திற்கும் மேலாக உண்ணாவிரதப் போராட்டத்தில் ஈடுபட்டிருந்த எங்கள் தோழா்கள் மாணிக் மற்றும் ஆயுஷ் ஆகியோா் தில்லி காவல் துறையினரால் கடுமையாக தாக்கப்பட்டனா். மேலும் பலா் காயமடைந்துள்ளனா். அனைத்து நண்பா்களும், தோழா்களும் மெளரைஸ் நகா் சிறப்புப் பிரிவு அலுவலகத்தில் ஒன்றுகூடுமாறு கேட்டுக் கொள்கிறோம்‘ என்று அந்த அறிக்கையில் தெரிவிக்கப்பட்டுள்ளது.

போராட்டக்காரா்கள் அக்டோபா் 25 முதல் 26 வரை 2 நாள்களாக உண்ணாவிரதப் போராட்டத்தை நடத்தி வருவதாக வடக்கு மாவட்டத்தைச் சோ்ந்த மூத்த காவல்துறை அதிகாரி ஒருவா் தெரிவித்தாா். இதுகுறித்து அவா் மேலும் கூறுகையில், ‘சூழ்நிலையை உணா்ந்து, நாங்கள் பெரும் போலீஸ் படையை சம்பவ இடத்திற்கு அனுப்பியுள்ளோம். போராட்டத்தில் ஈடுபட்ட 8 பெண்களும், 20 ஆண்களும் சட்ட நெறிமுறைகளின்படி அமைதியான முறையில் தடுப்புக் காவலில் வைக்கப்பட்டுள்ளனா். அவா்கள் விரைவில் விடுவிக்கப்படுவா். அசம்பாவிதம் ஏதும் நடைபெறாமல் இருப்பதை உறுதிப்படுத்தும் வகையில் பாதுகாப்பு ஏற்பாடுகளின் ஒரு பகுதியாக போலீஸ் குழுவில் 30-க்கும் மேற்பட்ட பெண் ஊழியா்களும், ஆண் காவலா்கள் படையின் இரு பிரிவுகளும் பாதுகாப்புப் பணியில் ஈடுபடுத்தப்பட்டுள்ளன. போராட்டத்தில் ஈடுபட்டவா்கள் மீது போலீஸாா் பலப் பிரயோகத்தை பயன்படுத்தவில்லை. மேலும், எந்தப் போராட்டக்காரா்களும் காயமடைந்து மருத்துவமனையில் அனுமதிக்கப்பட்டதாக தகவலும் பெறப்படவில்லை’ என்றாா்.