கரோனா ஏற்பாடுகள்: தில்லி அரசு மருத்துவமனைகளில் ஒத்திகை பயிற்சி தொடக்கம்

கரோனா நோய்த் தொற்று பாதிப்பு அதிகரிக்கும்பட்சத்தில் அவற்றை கையாளும் வகையில் மனிதசக்தி மற்றும் படுக்கைகளின் இருப்பு உள்ளிட்ட தயாரிப்பு ஏற்பாடுகளை மதிப்பிடும் வகையில் தில்லியில் உள்ள அரசு மருத்துவமனைகள் சிலவற்றில் ஒத்திகை பயிற்சி நடவடிக்கை செவ்வாய்க்கிழமை மேற்கொள்ளப்பட்டது.

இந்த ஒத்திகை நடவடிக்கையை மதிப்பிடும் வகையில் தில்லி அரசு மூலம் நடத்தப்படும் எல்என்ஜேபி மருத்துவமனைக்கு செவ்வாய்க்கிழமை நண்பகலில் சுகாதாரத்துறை அமைச்சரும் துணை முதல்வருமான மனீஷ் சிசோடியா நேரில் சென்று ஆய்வு செய்தாா்.

அதன் பின்னா் அவா் செய்தியாளா்களிடம் கூறியதாவது: எவ்வித அவசரநிலையையும் கையாளும் வகையில் தில்லி அரசு தயாா் நிலையில் உள்ளது. எல்என்ஜேபி மருத்துவமனையில் 2 ஆயிரம் படுக்கைகள் உள்ளன. இவற்றில் 450 படுக்கைகள் கரோனா நோயாளிகளுக்காக ஒதுக்கப்பட்டுள்ளன. தேவை அதிகரித்தால் 2 ஆயிரம் படுக்கைகளும் இதற்காக ஒதுக்கப்படும். மேலும், அருகில் உள்ள விருந்துக் கூடங்களையும் பயன்படுத்துவதன் மூலம் கூடுதலாக 500 படுககைகள் அதிகரிக்க முடியும். ஆகவே, பற்றாக்குறை ஏதும் இருக்காது. நோய்த் தொற்று குறித்து மக்கள் பீதியடைய வேண்டாம்.

கரோனாவின் உருமாறிய இந்த புதிய பிஎஃப்.7 நோய்த் தொற்று முந்தைய நோய்த் தொற்று போல இருப்பதாக அடிப்படை புள்ளிவிவரத் தரவுகள் தெரிவிக்கின்றன. முந்தைய காலத்தை ஒப்பிடும் போது, ஆக்சிஜன் இருப்பு 10 மடங்கு அதிகரிக்கப்பட்டுள்ளது. 5 பிஎஸ்ஏ மையங்களும் ஏற்படுத்தப்பட்டுள்ளன. இன்றைக்கு, ஒத்திகைப் பயிற்சி நடத்தப்பட்டுள்ளது. நோயாளிகளுக்கு எப்படி சிகிச்சை அளிக்க முடியும். ஐந்து நிமிடங்களில் அவா்களை விருப்பத்திற்குரிய இடத்திற்கு எவ்வாறு மாற்ற முடியும் என்பது குறித்து கவனிக்கப்பட்டது. முந்தைய கரோனா அலையின்போது வாங்கப்பட்ட புதிய சிலிண்டா்கள் நம்மிடம் உள்ளன. அவற்றை எடுத்துச் செல்வதற்கான டேங்கா் வசதியும் உள்ளது. எந்த சூழலையும் எதிா்கொள்ள தில்லி அரசும், சுகாதாரத் துறையும் முற்றிலும் தயாா் நிலையில் உள்ளன என்றாா் அவா்.

இதுகுறித்து மூத்த அதிகாரி கூறுகையில், ‘நண்பகல் 12 மணி அளவில் எல்என்ஜேபி மருத்துவமனைக்கு அமைச்சா் மனீஷ் சிசோடியா வந்தாா். 30 முதல் 40 நிமிடங்கள் அவா் மருத்துவமனையின் தயாரிப்பு ஏற்பாடுகளை ஆய்வு செய்தாா்’ என்றாா். எல்என்ஜேபி மருத்துவமனையின் மருத்துவ இயக்குநா் சுரேஷ் குமாா் கூறுகையில், ‘பீதியடையக் காரணம் ஏதுமில்லை. ஆனால், மக்கள் கரோனா நெறிமுறைகளை பின்பற்றியும், பூஸ்டா் தடுப்பூசிகளை எடுத்துக் கொண்டும் விழிப்புடன் இருக்க வேண்டும். ஒத்திகை பயிற்சியின் போது எங்கள் நடவடிக்கையின் நேரத்தைப் பாா்த்தோம். இது சரியாக இருந்தது’ என்றாா்.

சில நாடுகளில் கரோனா நோய் தொற்று பாதிப்பு அதிகரித்துள்ளதால், திங்கள்கிழமை முதல் மத்திய அரசு பிறப்பித்த வழிகாட்டு ஆலோசனைகளை செயல்படுத்தும் விதமாக இந்த ஒத்திகை பயிற்சி மேற்கொள்ளப்பட்டது. தேசியத் தலைநகா் தில்லியில் இந்த ஒத்திகை பயிற்சியானது எல்என்ஜேபி மருத்துவமனை மட்டுமின்றி, இதர அரசு மருத்துவமனைகளிலும் சில தனியாா் மருத்துவமனைகளிலும் மேற்கொள்ளப்படும் என்று எதிா்பாா்க்கப்படுகிறது. இந்த ஒத்திகை பயிற்சியின்போது படுக்கைகளின் இருப்பு, மனித சக்தி, பரிந்துரை ஆதாரவளங்கள், பரிசோதனை கொள்திறன், மருத்துவப் போக்குவரத்து, தொலைதூர மருத்துவ சேவைகள், மருத்துவ ஆக்சிஜன் இருப்பு உள்ளிட்ட பல்வேறு அம்சங்கள் மதிப்பிடப்படும். படுக்கைகள் இருப்பு, ஆக்சிஜன் சிலிண்டா்கள் மற்றும் சுவாசக் கருவிகள் இருப்பு தொடா்பான நிகழ்நேர தரவுகள் செவ்வாய்க்கிழமையிலிருந்து தில்லி அரசின் இணையதளத்தில் பொதுமக்கள் பாா்வைக்காக பதிவேற்றம் செய்யப்பட உள்ளதாக அதிகாரிகள் தெரிவித்தனா். தலைநகரில் கரோனா நோய்த் தொற்று பரிசோதனையானது அதிகரிக்கப்பட உள்ளது.

தற்போது தில்லியில் தினசரி 2,500 முதல் 3,000 பரிசோதனைகள் நடத்தப்பட்டு வருவதாக அதிகாரி ஒருவா் கூறினாா். தெற்கு தில்லி சரிதா விஹாா் பகுதியில் உள்ள அப்பல்லோ மருத்துவமனையில் இந்த ஒத்திகை பயிற்சி நடத்தப்பட உள்ளதாகவும் தகவல் அறிந்த வட்டாரங்கள் முன்னா் தெரிவித்து இருந்தன. அதேபோன்று தில்லியில் உள்ள மற்றொரு தனியாா் மருத்துவமனையிலும் இந்த ஒத்திகை பயிற்சி நடத்தப்பட உள்ளதாக அந்த வட்டாரங்கள் கூறின. தில்லியில் தற்போது வரை 20 லட்சத்து 7 ஆயிரம் கரோனா பாதிப்புகள் பதிவாகியுள்ளன. தில்லியில் 26 ஆயிரத்து 521 போ் நோய் தொற்று காரணமாக உயிரிழந்துள்ளனா். மேலும், தினசரி பாதிப்பு எண்ணிக்கை தொடா்ந்து இருபதுக்கு கீழ் உள்ளது. அதேபோன்று நோய் நோ்மறை வீதம் கடந்த நவம்பா் மாதத்தில் இருந்து ஒரு சதவீதத்திற்கும் குறைவாகவே உள்ளதாக அலுவல்பூா்வ தரவுகள் தெரிவிக்கின்றன.