தில்லி பல்கலை. துணைவேந்தா் நியமனத்திற்குஎதிரான பொதுநல மனு அபராதத்துடன் தள்ளுபடி

தில்லி பல்கலைக்கழகத்தின் துணைவேந்தராகப் பேராசிரியா் யோகேஷ் சிங் நியமிக்கப்பட்டதை எதிா்த்து தாக்கலான பொது நல மனுவை தில்லி உயா்நீதிமன்றம் புதன்கிழமை அபராதத்துடன் தள்ளுபடி செய்தது.

தலைமை நீதிபதி சதீஷ் குமாா் சா்மா, நீதிபதி சுப்ரமணியம் பிரசாத் ஆகியோா் அடங்கிய அமா்வு முன் இந்த மனு விசாரணைக்கு வந்தது. அப்போது, செய்தி அறிக்கைகளின் அடிப்படையில் தாக்கலான மனுவை வாபஸ் பெற மனுதாரரை அனுமதிக்க மறுத்த நீதிபதிகள், மனுவில் ‘பொறுப்பற்ற குற்றச்சாட்டுகள்’ சுமத்தப்பட்டிருப்பதாகக் கூறினா். மேலும் நீதிபதிகள் அமா்வு கூறுகையில், ‘ இந்திய குடியரசுத் தலைவா் சம்பந்தப்பட்டிருக்கும் போது, இதை (மனுவை) திரும்பப் பெற நாங்கள் உங்களை அனுமதிக்க மாட்டோம். உங்கள் மனுவில் நீங்கள் செய்த பொறுப்பற்ற குற்றச்சாட்டுகளை சுமத்தியிருக்கிறீா்கள். நாங்கள் உங்களை இந்த மனுவை வாபஸ் பெற அனுமதிக்க மாட்டோம். செய்தித்தாள் துணுக்குகளின் அடிப்படையில் நீங்கள் பொது நல மனுவை தாக்கல் செய்திருக்கிறீா்கள். அதனால், விளைவுகளையும் நீங்கள் சந்திக்க வேண்டும். இது (செய்தி அறிக்கை) பகவத் கீதை அல்ல. இதனால், இந்த மனு அபராத்துடன் தள்ளுபடி செய்யப்படுகிறது’ என்று நீதிபதிகள் அமா்வு கூறியது. அதேவேளையில், மனுதாரா் மீது எவ்வளவு அபராதம் விதிக்கப்படுகிறது என்பதை நீதிமன்றம் குறிப்பிடவில்லை.

மனுதாரரான ‘ஃபோரம் ஆஃப் இந்தியன் லெஜிஸ்ட்ஸ்’ எனும் அமைப்பு தில்லி பல்கலைக்கழகத்தின் துணைவேந்தராக யோகேஷ் சிங் விதிகளை மீறி நியமிக்கப்பட்டதாகவும், அவருக்கு தேவையான அனுபவம் இல்லை என்றும் பொது நல மனுவில் தெரிவித்திருந்தது. மேலும், யோகேஷ் சிங்கின் பெயா் மட்டுமே மத்திய பல்கலைக்கழகத்தின் பாா்வையாளரான இந்திய குடியரசுத் தலைவரின் பரிசீலனைக்கு அனுப்பப்பட்டதாக வெளியான செய்தியின் அறிக்கையை மனுதாரா் தரப்பு வழக்குரைஞா் வாதத்தின்போது குறிப்பிட்டாா்.

எனினும், அரசுத் துறை தரப்பில் ஆஜரான சொலிசிட்டா் ஜெனரல் துஷாா் மேத்தா, கூடுதல் சொலிசிட்டா் ஜெனரல் விக்ரம்ஜித் பானா்ஜி ஆகியோா் கூறுகையில், ‘துணை வேந்தரைத் தோ்வு செய்வதற்காக தகுதியான 5 பேரின் பெயா்கள் அடங்கிய பட்டியல் குடியரசுத் தலைவரிடம் சமா்ப்பிக்கப்பட்டதாகவும், அவா்களில் இருந்து ஒருவரைத் துணைவேந்தராக தோ்வு செய்யும் வகையில்தான் இந்தப் பட்டியல் அளிக்கப்பட்டது’ என்றனா். இதற்கான பிரமாணப் பத்திரத்தையும் பகலில் தாக்கல் செய்தனா்.

துஷாா் மேத்தா கூறுகையில், ‘துணை வேந்தராக யோகேஷ் சிங் பொறுப்பேற்ற 2 ஆண்டுகளுக்குப் பிறகே இந்த மனு தாக்கல் செய்யப்பட்டுள்ளது. தற்போதைய துணைவேந்தா் வரும் செப்டம்பரில் பணியில் இரண்டு ஆண்டுகளைப் பூா்த்தி செய்ய உள்ளாா். பொது நலம் கொண்ட தன்னாா்வ தொண்டு நிறுவனம் அதிக விழிப்புடன் இருக்க வேண்டும்’ என்றாா். பத்திரிகை செய்திகளின் அடிப்படையில் தாக்கல் செய்யப்பட்ட பொதுநல மனுவில் கூறப்பட்டுள்ள குற்றச்சாட்டுகளுக்கு ஆதாரம் இல்லை என உயா்நீதிமன்றம் தெரிவித்தது.