பெண் மருத்துவருக்கு துன்புறுத்தல்: தில்லி பாஜக தலைவா் கண்டனம்

புது தில்லி: தில்லி அரசு மருத்துவமனையின் மருத்துவக் கண்காணிப்பாளரால் பெண் மருத்துவா் நீண்டகாலமாக துன்புறுத்தப்பட்டதையும், இந்த விவகாரத்தில் சுகாதாரத் துறை அமைச்சா் செளரவ் பரத்வாஜ் தொடா்ந்து மெளனம் காத்து வருவதையும் வன்மையாகக் கண்டிப்பதாக தில்லி பாஜக தெரிவித்துள்ளது.

இதுகுறித்து வீரேந்திர சச்தேவா திங்கள்கிழமை மேலும் தெரிவித்திருப்பதாவது: இந்த விவகாரத்தை முழுமையாக அறிந்திருந்தும் அமைச்சா் பரத்வாஜ் அமைதியாக இருப்பது வன்மையாகக் கண்டிக்கத்தக்கதாகும். இந்த விஷயம் ஊடகங்கள் மூலம் வெளிவந்துள்ளதால் ஆம் ஆத்மி கட்சித்லைவா்களின் இரட்டை முகத்தை பொதுமக்கள் இப்போது பாா்க்கின்றனா்.மேலும், துணைநிலை ஆளுநருக்கு எம்பி சஞ்சய் சிங் எழுதிய கடிதமும் வெட்கமற்ற செயலாகும். ஏனெனில், மருத்துவக்ண்காணிப்பாளரை இடைநீக்கம் செய்ய

2023, நவம்பரில் அப்போதைய முதல்வா் அரவிந்த் கேஜரிவால் தலைமையிலான என்சிசிஎஸ்ஏ-வுக்கு துணைநிலை ஆளுநா் ஏற்கெனவே பரிந்துரைத்திருந்தது சஞ்சய் சிங்கிற்கு நன்றாகவே தெரியும்.

இந்நிலையில், 11 மாதங்கள் கடந்துவிட்ட போதிலும், துணைநிலை ஆளுநரின் பரிந்துரையை செயல்படுத்த கேஜரிவால் அல்லது அதிஷி மா்லேனா என்சிசிஎஸ்ஏ கூட்டத்தை கூட்டவில்லை. இந்த விவகாரத்தில் செளரவ் பரத்வாஜ், கேஜரிவால் மற்றும் அதிஷி ஆகியோா் உண்மையான குற்றவாளிகள் ஆவா். சஞ்சய் சிங், துணைநிலை ஆளுநருக்கு கடிதம் எழுதுவதற்குப் பதிலாக நவம்பா் 2023 முதல் துணைநிலை ஆளுநரின் உத்தரவுகளுக்குப் பிறகும், மருத்துவக் கண்காணிப்பாளா் ஏன் இன்னும் இடைநீக்கம் செய்யப்படவில்லை என்று கேஜரிவாலையோ அல்லது அதிஷியையோ கேட்டிருக்க வேண்டும் என்றாா் வீரேந்திர சச்தேவா.