எம்சிஓசிஏ வழக்கில் பிணை கோரி ஆம்ஆத்மி முன்னாள் எம்எல்ஏ மனு: விசாரணைக்கு உச்சநீதிமன்றம் ஒப்புதல்

மகாராஷ்டிரா ஒழுங்கமைக்கப்பட்ட குற்றத் தடுப்புச் சட்டத்தின் (எம்.சி.ஓ.சி.ஏ) கீழ் தொடரப்பட்ட வழக்கில் தனக்கு பிணை மறுக்கப்பட்டதை எதிா்த்து ஆம் ஆத்மி கட்சியின் முன்னாள் எம்.எல்.ஏ நரேஷ் பல்யான் தாக்கல் செய்த மனுவை விசாரிக்க உச்ச நீதிமன்றம் திங்களன்று ஒப்புக்கொண்டது.

தாதா கபில் சங்வான் நடத்தும் குற்றக் கும்பலுக்கு உதவியதாகக் குற்றஞ்சாட்டப்பட்ட பல்யானுக்கு, ஆகஸ்ட் 3 அன்று தில்லி உயா் நீதிமன்றம் பிணை மறுத்தது. அவருக்கும் அந்த தாதாவுக்கும் இடையிலான உரையாடல், இருவருக்கும் இடையே ஒரு ‘குற்றத் தொடா்பு‘ இருப்பதைக் காட்டுவதாக உயா் நீதிமன்றம் கூறியிருந்தது.

உயா் நீதிமன்ற உத்தரவை எதிா்த்து பல்யான் தாக்கல் செய்த மனு, நீதிபதிகள் விக்ரம் நாத் மற்றும் சந்தீப் மேத்தா ஆகியோா் அடங்கிய அமா்வு முன்பு திங்களன்று விசாரணைக்கு வந்தது. அப்போது இந்த மனு குறித்து தில்லி காவல்துறை நான்கு வாரங்களுக்குள் பதிலளிக்க வேண்டும் என்று அந்த அமா்வு உத்தரவிட்டது.

மிரட்டிப் பணம் பறித்த வழக்கில் விசாரணை நீதிமன்றம் அவருக்கு பிணை வழங்கிய அதே நாளில், டிசம்பா் 4, 2024 அன்று எம்.சி.ஓ.சி.ஏ சட்டத்தின் கீழ் ஒரு வழக்கில் இந்த முன்னாள் எம்.எல்.ஏ கைது செய்யப்பட்டாா்.

உயா் நீதிமன்றத்தில் பிணை கோரிய பல்யான், தனக்கு எதிராக ‘ஒரு ஆதாரம் கூட இல்லை‘ என்றும், இந்த வழக்கு ‘முற்றிலும் ஆதாரமற்றது‘ என்றும் வாதிட்டாா். தானும் ஒரு பாதிக்கப்பட்டவா் என்றும், அந்த ரவுடிக்கு எதிராகப் புகாா் அளித்திருந்ததாகவும், அரசியல் பழிவாங்கும் நடவடிக்கையின் காரணமாக இப்போது சங்வானின் நெருங்கிய கூட்டாளியாகச் சித்தரிக்கப்படுவதாகவும் பல்யான் முன்வைத்த வாதத்தை உயா் நீதிமன்றம் நிராகரித்தது.

மற்ற ‘குற்றஞ்சாட்டும் ஆதாரங்களைக்‘ கருத்தில் கொண்டு, சங்வானுக்கு எதிரான பல்யானின் புகாா்கள் தற்போதைய நிலையில் அவரைக் குற்றமற்றவா் என்று நிரூபிக்க முடியாது என்றும், அரசியல் பழிவாங்கல் குறித்த அவரது வாதம் ‘வெறும் ஆதாரமற்றது மற்றும் முற்றிலும் ஆதாரமற்றது‘ என்றும் உயா் நீதிமன்றம் கூறியது.

காவல்துறையினரால் சேகரிக்கப்பட்ட ஆதாரங்களின் ‘மதிப்பீடு‘, பல்யானுக்கும் மற்ற கும்பல் உறுப்பினா்களுக்கும் இடையே ‘தெளிவான தொடா்பு‘ இருப்பதைக் காட்டுவதாக அது முடிவு செய்தது. ‘மேல்முறையீட்டாளா் (பல்யான்) கடந்த காலத்தில் கபில் சங்வானுக்கு எதிராகப் புகாா்களை அளித்திருந்தாா் என்பதற்காக மட்டுமே, புலனாய்வு அமைப்பால் சேகரிக்கப்பட்ட ஆதாரங்களை மறுக்கவோ அல்லது செல்லாததாக்கவோ முடியாது. குறிப்பாக, அவருக்கும் கபில் சங்வானுக்கும் இடையிலான உரையாடல், இருவருக்கும் இடையே ஒரு தீவிரமான குற்றத் தொடா்பு இருப்பதைக் காட்டுகிற,‘ என்று உயா் நீதிமன்றம் கூறியது.

2025 மே 27 அன்று விசாரணை நீதிமன்றம் பிணை மறுத்ததையடுத்து, பல்யான் உயா் நீதிமன்றத்தில் பிணை கோரியிருந்தாா்.