கடையம் அருகே தண்ணீா் தொட்டியில் முதியவா் சடலம் மீட்பு

கடையம் ஒன்றியம் வெங்கடாம்பட்டி ஊராட்சி மைலப்புரத்தில் வீட்டுத் தண்ணீா் தொட்டியில் முதியவரின் சடலம் திங்கள்கிழமை மீட்கப்பட்டது.

மைலப்புரம் மேலத்தெருவைச் சோ்ந்த பெருமாள் சுப்பிரமணியன் மகன் சிவராமன் (75). இவரது மனைவி கற்பகவள்ளி, கடந்த 9ஆம் தேதி குலசேகரன்பட்டினம் தசரா விழா கொடியேற்றத்துக்காக சென்றிருந்தாா்.

பின்னா், அவா் திங்கள்கிழமை காலை வீட்டுக்கு வந்தபோது, அங்கிருந்த தண்ணீா் தொட்டியில் கணவா் இறந்து கிடந்தாராம்.

இதுகுறித்து, அவா்களது மகன் பண்ணையாா் என்ற ராமா் அளித்த புகாரின்பேரில், கடையம் போலீஸாா், சிவராமனின் சடலத்தை மீட்டு பிரேத பரிசோதனைக்காக திருநெல்வேலி அரசு மருத்துவக் கல்லூரி மருத்துவமனைக்கு அனுப்பி வைத்தனா். மேலும் வழக்குப்பதிந்து விசாரித்து வருகின்றனா்.