கோதேஸ்வரம் கோயில் திருவிழா நாளை தொடக்கம்

மார்த்தாண்டம் அருகேயுள்ள அருள்மிகு கோதேஸ்வரம் பத்ரகாளி கோயில் வருஷாபிஷேக திருவிழா சனிக்கிழமை (ஜூன் 9) தொடங்கி 9 நாள்கள் நடைபெறுகிறது.
விழா நாள்களில் தினமும் காலையில் கணபதி ஹோமம்,  ஸ்தோத்திர பாராயணம், காலை 7 மணிக்கு தீபாராதனை, அஷ்டாபிஷேகம், சகஸ்ரநாம அர்ச்சனை,  பிற்பகல் 1 மணிக்கு அன்னதானம் நடைபெறும். மாலை 3 மணிக்கு திருநாம ஜெபவேள்வி, மாலை 6 மணிக்கு திருவிளக்கு பூஜை, இரவு 7 மணிக்கு அஷ்டோத்திர சதநாம அர்ச்சனை, சிறப்பு பூஜை, தீபாராதனை நடைபெறும். 
2ஆம் திருநாளான ஜூன் 10ஆம் தேதி காலை 9 மணிக்கு இக்கோயில் சமய வகுப்பு மாணவர், மாணவிகளின் பண்பாட்டுப் போட்டிகள் நடைபெறுகின்றன. 4 ஆம் திருநாளன்று காலை 9.30 மணிக்கு சுமங்கலி பூஜை,  மாலை 3 மணிக்கு ராகுகால துர்கா பூஜை,  மாலை 5 மணிக்கு ஏகாதசி பூஜை நடைபெறுகிறது. 
7ஆம் திருநாளான ஜூன் 15ஆம் தேதி இரவு 8 மணிக்கு மாணவர் மாநாடு நடைபெறும். 9ஆம் திருநாளன்று காலை 8 மணிக்கு கிள்ளியூர் ஒன்றிய சமய வகுப்பு மாணவர்களுக்கான போட்டிகள் நடைபெறுகின்றன.
ஏற்பாடுகளை கன்னியாகுமரி மாவட்ட திருக்கோயில் நிர்வாகம் மற்றும் கோதேஸ்வரம் கோயில் சேவா அறக்கட்டளை ஆகியன இணைந்து செய்துள்ளன.