நாளை பொது விநியோகத் திட்ட குறைதீர் முகாம்

பொது விநியோகத் திட்ட குறைதீர் முகாம் இம்மாவட்டத்தில் உள்ள நான்கு வட்டங்களிலும் சனிக்கிழமை (ஜூன் 9) நடைபெறுகிறது. 
இதுகுறித்து மாவட்ட ஆட்சியர் பிரசாந்த் மு. வடநேரே வெளியிட்ட செய்திக்குறிப்பு: பொது விநியோகத் திட்ட குறைதீர் முகாம் இம்மாவட்டத்தில் உள்ள நான்கு வட்டங்களிலும் சனிக்கிழமை   நடைபெறவுள்ளது.
அகஸ்தீசுவரம் வட்டத்தில் தெங்கம்புதூர் பேரூராட்சி அலுவலகம்,  தோவாளை வட்டத்தில் திடல் ஊராட்சி அலுவலகம்,  கல்குளம் வட்டத்தில் காட்டாத்துறை ஊராட்சி அலுவலகம்,  விளவங்கோடு வட்டத்தில் இணையம்புத்தன்துறை ஊராட்சி அலுவலகம் ஆகியவற்றில், அந்தந்த வட்ட வழங்கல் அலுவலர்கள் தலைமையில், காலை 10 மணிமுதல் பிற்பகல் 1 மணிவரை இந்த குறைதீர் முகாம்   நடைபெறவுள்ளது.  
இந்த ஊராட்சி, பேரூராட்சி பகுதிக்குள்பட்ட குடும்ப அட்டைதாரர்களில் மின்னணு குடும்ப அட்டை புகைப்படம் மற்றும் தேவையானஆவணங்கள் இல்லாமல் இதுவரை மின்னணு குடும்ப அட்டை பெறமுடியாமல் உள்ளவர்கள்,  ரேஷன் கடைகளில்   ஒட்டப்பட்டுள்ள பட்டியலில் இடம்பெற்றுள்ள குடும்ப அட்டைதாரர்கள் தங்களது குடும்பத் தலைவரின் புகைப்படம்,  செல்லிடப்பேசி எண்,  ஆதார் எண் பதிவு செய்தல் போன்ற திருத்தங்களை செய்து விரைவில் மின்னணு குடும்ப அட்டை பெறுவதற்கு மனு அளித்து தீர்வு காணலாம் என செய்திக்குறிப்பில் தெரிவிக்கப்பட்டுள்ளது.