குமரியில் சாரல் மழை நீடிப்புஅணைகளில் இருந்து தொடா்ந்து வெள்ள நீா் வெளியேற்றம்

குமரி மாவட்டத்தில் சாரல் மழை நீடிக்கும் நிலையில் வெள்ள அபாயத்தைத் தடுக்கும் வகையில் மாவட்டத்தில் உள்ள அணைகளில் இருந்து உபரி நீா் வெள்ளியேற்றப்பட்டு வருகிறது.

வடகிழக்குப் பருவ மழை தொடங்கும் முன்னரே குமரி மாவட்டத்தில் மழை தீவிரமாகப் பெய்து வருகிறது. இதில் குறிப்பாக தென்மேற்குப் பருவ மழையால் அணைகள் நிரம்பியிருந்த நிலையில், தற்போது பெய்து வரும் மழை காரணமாக அணைகளில் இருந்து உபரிநீா் தொடா்ந்து வெளியேற்றப்பட்டு வருகிறது.

அணைகளின் நீா்மட்டம்: வெள்ளிக்கிழமை காலை நிலவரப்படி பேச்சிப்பாறை அணையின் நீா்மட்டம் 43.66 அடியாக இருந்தது. அணைக்கு விநாடிக்கு 1489 கன அடி நீா் உள்வரத்தாக வந்து கொண்டிருந்தது. அணையிலிருந்து விநாடிக்கு 1450 கன அடி தண்ணீா் மறுகால் மதகுகள் வழியாக வெளியேற்றப்பட்டது.

பெருஞ்சாணி அணையின் நீா்மட்டம் 74.49 அடியாக இருந்தது. அணைக்கு விநாடிக்கு 1182 கன அடி நீா் உள்வரத்தாக வந்து கொண்டிருந்தது. அணையிலிருந்து விநாடிக்கு 1480 கன அடி நீா் மறுகால் மதகுகள் வழியாக வெளியேற்றப்பட்டது. மேலும் விநாடிக்கு 500 கன அடி நீா் பாசனக்கால்வாயில் திறந்து விடப்பட்டிருந்தது. சிற்றாறு 1 அணையின் நீா்மட்டம் 16.17 அடியாக இருந்தது. அணைக்கு விநாடிக்கு 444 கன அடி நீா் உள்வரத்தாக வந்து கொண்டிருந்தது. விநாடிக்கு 536 கனஅடி நீா் உபரியாக வெளியேற்றப்பட்டது. சிற்றாறு 2 அணையின் நீா்மட்டம் 16.27 அடியாக இருந்தது.

தாமிரவருணியாற்றில் வெள்ளப் பெருக்கு: பேச்சிப்பாறை, பெருஞ்சாணி மற்றும் சிற்றாறு அணைகளிலிருந்து உபரிநீா் வெளியேற்றப்பட்டு வரும் நிலையில், குழித்துறை தாமிரவருணியாற்றில் வெள்ளப் பெருக்கு ஏற்பட்டுள்ளது. திற்பரப்பு அருவியிலும் வெள்ளம் கட்டுக்கடங்காமல் கொட்டுகிறது.