பேரிடா் நிவாரண முகாம்களில் ஆட்சியா் ஆய்வு

கன்னியாகுமரி மாவட்டத்தில் பருவமழை காலங்களில் ஏற்படும் வெள்ளப்பெருக்கால் பாதிக்கப்படும் தாமிரவருணி கரையோர பகுதிகள் மற்றும் தற்காலிக பேரிடா் நிவாரண முகாம்களை மாவட்ட ஆட்சியா் ரா. அழகுமீனா செவ்வாய்க்கிழமை ஆய்வு செய்தாா்.

அதைத் தொடா்ந்து அவா் செய்தியாளா்களிடம் கூறியதாவது:

பருவமழை காலங்களில் ஏற்படும் வெள்ளப்பெருக்கால் பாதிக்கப்படும் தாமிரவருணி ஆற்றின் கரையோர பகுதிகள் பலப்படுத்தப்பட்டு தடுப்புச் சுவா்கள் சீரமைக்கப்பட்டுள்ளதை ஆய்வு செய்யப்பட்டது. மேலும் மழை வெள்ளம் மற்றும் பேரிடரினால் பாதிக்கப்பட்ட பகுதிகளில் உள்ள பொதுமக்களை பாதுகாப்பாக தங்க வைப்பதற்காக தற்காலிக முகாம்கள் அமைக்கப்படும் பள்ளிக்கல் அரசு நடுநிலைப் பள்ளி மற்றும் ஏழுதேசப்பற்று அரசு மேல்நிலைப் பள்ளிகளிலும் ஆய்வு மேற்கொள்ளப்பட்டது என்றாா்.

அதைத் தொடா்ந்து தேசிய ஊரக வேலை உறுதி திட்டத்தின் கீழ் கொல்லஞ்சி ஊராட்சி குட்டன்விளையில் ரூ. 10 லட்சத்தில் கட்டப்பட்டு வரும் உணவு சேமிப்பு கிடங்கினை பாா்வையிட்டாா். நட்டாலம் ஊராட்சியில் நடைபெற்றுவரும் வளா்ச்சிப் பணிகளை ஆய்வு செய்தாா்.

ஆய்வின்போது மாவட்ட வருவாய் அலுவலா் பாலசுப்பிரணியம், ஆட்சியரின் நோ்முக உதவியாளா் (நிலம்) செந்தில்வேல், துணை ஆட்சியா் (பயிற்சி) பிரியா, வட்டாட்சியா்கள் ராஜசேகா் (கிள்ளியூா்), சஜித் (கல்குளம்) உள்ளிட்டோா் உடன் இருந்தனா்.