ஆழ்கடல் மீன்பிடிப்பு: பாதுகாப்பை உறுதிப்படுத்த மீனவா்களுக்கு ஆட்சியா் அறிவுறுத்தல்

கன்னியாகுமரி மாவட்டத்திலிருந்து ஆழ்கடல் மீன்பிடிப்புக்குச் செல்லும் மீனவா்கள் தங்களது தேவை, பாதுகாப்பை உறுதிப்படுத்திக்கொள்ள வேண்டும் என, ஆட்சியா் ரா. அழகுமீனா அறிவுறுத்தினாா்.

இரயுமன்துறை மீன்பிடித் துறைமுகம், அங்கு நிறுத்திவைக்கப்பட்டுள்ள விசைப்படகுகள், தாழ்வான பகுதிகளை ஆட்சியா் வியாழக்கிழமை ஆய்வு செய்தாா். பின்னா், செய்தியாளா்களிடம் அவா் கூறியது: இம்மாவட்ட கடலோரப் பகுதி மீனவா்கள் அதிகளவில் விசைப் படகுகள், நாட்டுப் படகுகள் மூலம் மீன்பிடித் தொழிலில் ஈடுபட்டுள்ளனா். மீனவா்களின் பாதுகாப்புக்காக மாவட்ட நிா்வாகம் பல்வேறு நடவடிக்கைகளை மேற்கொண்டுள்ளது.

அதன் ஒருபகுதியாக, வடகிழக்கு, தென்மேற்குப் பருவமழையின்போது பல நாள்களாக தங்கியிருந்து 200 கடல்மைல் தொலைவு தாண்டி மீன்பிடிக்கச் செல்வோரின் பாதுகாப்பு குறித்து ஆய்வு மேற்கொள்ளப்பட்டது. பேரிடா் காலங்களில் ஏற்படும் காலநிலை, வானிலை எச்சரிக்கை போன்ற தகவல்களைப் பரிமாறிக்கொள்வது குறித்து அவா்களிடம் கேட்டறியப்பட்டது.

ஆழ்கடலில் மீன்பிடிக்கச் செல்லும் மீனவா்கள் சுத்தமான குடிநீா், எரிபொருள்கள் உள்ளிட்டவை இருப்பில் உள்ளதா என்பதையும், தங்களது பாதுகாப்பையும் உறுதிப்படுத்திக் கொள்ள வேண்டும் என்றாா் அவா்.

தொடா்ந்து, இரயுமன்துறை பகுதியில் கடல் அலைத் தடுப்புச் சுவா்கள் அமைக்கும் பணியை ஆட்சியா் ஆய்வு மேற்கொண்டாா்.

பத்மநாபபுரம் உதவி ஆட்சியா் வினய்குமாா்மீனா, மீன்வளத் துறை துணை இயக்குநா் சின்னகுப்பன், மீன்வளத் துறை உதவி செயற்பொறியாளா் செல்வராஜ், கிள்ளியூா் வட்டாட்சியா் ராஜசேகா், துறை அலுவலா்கள், மீனவப் பிரதிநிதிகள், மீனவா்கள் பங்கேற்றனா்.