மாணவிக்கு கொலை மிரட்டல்: இளம்பெண் மீது வழக்கு

கன்னியாகுமரி அருகே சட்டக்கல்லூரி மாணவிக்கு கொலை மிரட்டல் விடுத்ததாக இளம்பெண் மீது போலீஸாா் ஞாயிற்றுக்கிழமை வழக்குப் பதிந்தனா்.

கன்னியாகுமரியை அடுத்த சரவணந்தேரியைச் சோ்ந்தவா் அருண்லட்சுமி ராமன். இவரிடம் பொட்டல் குளத்தைச் சோ்ந்த ஹரிஹரசுதன் மனைவி முருகேஸ்வரி (22), ரூ. 5.50 லட்சம் வாங்கிவிட்டு திருப்பிக் கொடுக்கவில்லை என்று கூறப்படுகிறது.

இந்நிலையில் அருண்லட்சுமி ராமனின் மகள் அம்ஷிதா, சட்டக்கல்லூரிக்கு பேருந்தில் செல்வதற்காக மகாதானபுரம் சந்திப்பில் காத்திருந்தாராம். அப்போது, அங்கு வந்த முருகேஸ்வரி, அம்ஷிதாவுக்கு கொலை மிரட்டல் விடுத்தாராம்.

இதுகுறித்த புகாரின்பேரில் கன்னியாகுமரி காவல் நிலைய போலீஸாா், முருகேஸ்வரி மீது வழக்குப் பதிந்து விசாரணை மேற்கொண்டு வருகின்றனா்.