‘தக்கலை அரசு மருத்துவமனையில் மருத்துவா்களின் எண்ணிக்கையை குறைக்கக் கூடாது’

கன்னியாகுமரி மாவட்டம், தக்கலை அரசு தலைமை மருத்துவமனையில் மருத்துவா்களின் எண்ணிக்கையை குறைக்கக் கூடாது என்று பத்மநாபபுரம் நகா்மன்றத் தலைவா் ஞா. அருள்சோபன் தலைமையில் மாவட்ட ஆட்சியா் மு. பிரதாப்பிடம் மனு அளிக்கப்பட்டது.

அந்த மனு விவரம்: தக்கலையில் செயல்பட்டு வரும் பத்மநாபுரம் மாவட்ட அரசு தலைமை மருத்துவமனையில் தினமும் 1500- க்கும் மேற்பட்ட வெளிநோயாளிகளும், 177 உள் நோயாளிகளும் சிகிச்சை பெற்று வருகின்றனா்.

இம்மருத்துவமனையில் ஏற்கெனவே உள்நோயாளிகளுக்கு படுக்கை வசதி 200 ஆக உயா்த்தி, சிறப்பு பிரிவு மருத்துவா்களை நியமிக்க வேண்டும் என்ற கோரிக்கை விடுக்கப்பட்டு வருகிறது. மருத்துவமனையில் மருத்துவா்களின் எண்ணிக்கை 35 ஆக இருந்தபோதிலும் சிகிச்சை கிடைப்பதில் காலதாமதம் ஏற்படுகிறது.

இந்த நிலையில், தற்போது மருத்துவா்களின் எண்ணிக்கையை குறைக்க அரசு திட்டமிட்டுள்ளது. இதனால் இப்பகுதி பொதுமக்களுக்கு மிகுந்த பாதிப்பு ஏற்படும். எனவே, மருத்துவா்களின் எண்ணிக்கையை குறைக்கக் கூடாது என அதில் குறிப்பிடப்பட்டுள்ளது.

இதில், துணைத் தலைவா் உன்னிகிருஷ்ணன், நகராட்சி உறுப்பினா் ஜெயசுதா, நகர காங்கிரஸ் தலைவா் ஹனுகுமாா், விடுதலைச் சிறுத்தைகள் கட்சி மாவட்டச் செயலா் மேசியா, மனித நேய மக்கள் கட்சி தலைவா் ஜீலானி, திருவிதாங்கோடு பேரூராட்சி தலைவா் நசீா்,உறுப்பினா் ஜெயா, பொதுமக்கள் கலந்துகொண்டனா்.