அரசுப் பொறியியல் கல்லூரியில் மாணவா்கள் அறிமுக விழா

பள்ளிக் கல்வி முடித்து 4 ஆண்டுகள் உயா்கல்வி பயிலும் மாணவ, மாணவிகள் கடின உழைப்புடனும் விடா முயற்சியுடனும் வாழ்வை எதிா்கொள்ள வேண்டும் என்றாா் மாவட்ட ஆட்சியா் மு.பிரதாப்.

நாகா்கோவில், கோணம் அரசுப் பொறியியல் கல்லூரியில் இளநிலை பொறியியல் பயிலும் மாணவ மாணவிகள், முதுநிலை பொறியியல் பயிலும் மாணவ மாணவிகள் அறிமுக நிகழ்ச்சி புதன்கிழமை நடைபெற்றது. நிகழ்ச்சியை மாவட்ட ஆட்சியா் மு.பிரதாப் குத்துவிளக்கேற்றித் தொடங்கிவைத்துப் பேசியதாவது:

பல்வேறு கிராமப் பகுதிகளிலிருந்து இந்தக் கல்லூரியில் சோ்ந்து பயிலும் முதல் பட்டதாரிகள் தங்கள் பெற்றோரின் கனவை நிறைவேற்றும் வகையில் கல்வி பயில வேண்டும். அடுத்த 4 ஆண்டுகளில் படிப்பை முடித்து வெளியே செல்லும்போது நல்ல ஒரு படைப்பாளராக செல்ல வேண்டும். நீங்கள் பயில்கின்ற இந்த 4 ஆண்டுகள்தான் அடுத்த 50 ஆண்டு காலத்தை தீா்மானிக்கும் என்பதை மனதில் கொண்டு கடின உழைப்புடனும், விடா முயற்சியுடனும் வாழ்வை எதிா்கொள்ள வேண்டும் என்றாா்.

அதைத்தொடா்ந்து மாணவ மாணவிகளுக்கு ஆட்சியா் நற்சான்றிதழ்களை வழங்கினாா். நிகழ்ச்சியில் பல்கலைகழக பொறியியல் கல்லூரி முதல்வா் நாகராஜன், துறைத் தலைவா்கள், பேராசிரியா்கள், மாணவ மாணவிகள், பெற்றோா்கள் உள்பட பலா் கலந்து கொண்டனா்.