கீரிப்பாறை அருகே சுருண்டு விழுந்து இறந்த யானை: வனத்துறையினா் விசாரணை

கன்னியாகுமரி மாவட்டம், கீரிப்பாறை அருகே தனியாா் எஸ்டேட் பகுதியில் செவ்வாய்க்கிழமை யானை இறந்து கிடந்தது குறித்து வனத்துறையினா் விசாரணை மேற்கொண்டுள்ளனா்.

கன்னியாகுமரி மாவட்டத்தில் மலையோர கிராமங்களில் கடந்த சில நாள்களாக காட்டு யானைகள் ஊருக்குள் புகுந்து பொதுமக்களுக்கு தொந்தரவு அளித்து வருகின்றன.

இந்த நிலையில், கிரீப்பாறை அருகே கரும்பாறை எஸ்டேட் பகுதியில் சாலையோரத்தில் காட்டு யானை நடந்து சென்றது. சற்று நேரத்தில் அந்த யானை நிலை தடுமாறி கீழே விழுந்தது. பின்னா் அந்த யானையால் எழுந்திருக்க முடியவில்லை. இதைப் பாா்த்த அப் பகுதியினா், வனத்துறையினருக்குத் தகவல் தெரிவித்தனா்.

மாவட்ட வன அலுவலா் அன்பு உத்தரவின்பேரில் கீரிப்பாறை வனச்சரக அலுவலா்கள் சம்பவ இடத்துக்கு சென்று அந்த காட்டு யானையை பரிசோதித்தபோது, உயிரிழந்திருப்பது தெரியவந்தது. இது குறித்து உயா்அதிகாரிகளுக்கு தகவல் தெரிவிக்கப்பட்டது.

திருநெல்வேலி கால்நடை மருத்துவக் குழுவினா் சம்பவ இடத்துக்கு வந்து யானையை பரிசோதனை செய்தனா். 22 வயது மதிக்கத்தக்க இந்த ஆண் யானையின் மூக்கு மற்றும் வாய் பகுதியில் காயங்கள் இருப்பதும் தெரியவந்தது. உடற்கூறாய்வுக்குப் பின்னா் அந்த யானை அதே பகுதியில் புதைக்கப்பட்டது.

இதுகுறித்து மாவட்ட வன அலுவலா் அன்பு கூறியதாவது:

யானையின் இறப்பு குறித்து விசாரணை நடத்தப்பட்டு வருகிறது. மேலும், உடற்கூறாய்வு அறிக்கை கிடைத்த பிறகே இறப்புக்கான காரணம் தெரிய வரும் என்றாா்.