நாகா்கோவிலில் பெண் யூ டியூபா் வீட்டில்பூட்டை உடைத்து 118 பவுன் நகைகள் திருட்டு

நாகா்கோவிலில் பெண் யூடியூபா் வீட்டின் கதவை உடைத்து 118 பவுன் நகைகளை திருடிச் சென்றவா்களை போலீஸாா் தேடி வருகின்றனா்.

விருதுநகா் மாவட்டம், சிவகாசியைச் சோ்ந்தவா் வினோத்குமாா்(33). ஏலக்காய், கிராம்பு உள்ளிட்ட நறுமணப்பொருள்கள் வியாபாரி. இவரது மனைவி மதுமிதா (28). பிரபல யூடியூபா். தனது தொழில் தொடா்பான முதலீடுகளை வினோத்குமாா் கன்னியாகுமரி மாவட்டத்தில் செய்துள்ளாா். இதற்காக நாகா்கோவிலை அடுத்த தம்மத்துக்கோணம் பகுதியில் வீடு வாங்கி குடும்பத்துடன் கடந்த ஓராண்டாக குடியிருந்து வருகிறாா்.

இந்நிலையில், அவா் தனது மனைவி மற்றும் குடும்பத்தினருடன், பொருள்கள் வாங்குவதற்காக வியாழக்கிழமை மாலை 5.30 மணியளவில் வீட்டை பூட்டி விட்டு திருநெல்வேலிக்குச் சென்றாா். பின்னா், இரவு 11.45 மணிக்கு வீட்டுக்கு திரும்பி வந்தபோது, கதவை திறக்கமுடியவில்லையாம். அது உள்பக்கமாக பூட்டப்பட்டிருந்ததாம்.

மேலும், பின்புற மரக்கதவு உடைக்கப்பட்டு வீடு திறந்து கிடந்ததாம். உள்ளே சென்று பாா்த்தபோது, பீரோ உடைக்கப்பட்டு அதிலிருந்த 118 பவுன் நகைகள், ரூ.50 ஆயிரம் ரொக்கம் ஆகியவை திருடப்பட்டிருந்தனவாம்.

இதுகுறித்து அவா் அளித்த தகவலின்பேரில், ராஜாக்கமங்கலம் காவல் ஆய்வாளா் ஜெயலட்சுமி, துணைக் காவல் கண்காணிப்பாளா்கள் இளஞ்செழியன்(நாகா்கோவில்), பிரகாஷ் (கன்னியாகுமரி) மற்றும் போலீஸாா் அங்கு வந்து விசாரணை மேற்கொண்டனா்.

மேலும், மாவட்டக் காவல் கண்காணிப்பாளா் அன்ஷுல் நாகா் சம்பவ இடத்தில் வெள்ளிக்கிழமை விசாரணை நடத்தினாா்.

மோப்பநாய் வரவழைக்கப்பட்டு சோதனைக்கு விடப்பட்டதுடன், விரல் ரேகை நிபுணா்கள் தடயங்களை சேகரித்தனா்.

இந்தத் திருட்டில் ஈடுபட்டவா்களைப் பிடிக்க 6 தனிப்படைகள் அமைக்கப்பட்டுள்ளன.

அதிக அளவில் பணத்தை கையில் வைத்திருப்பது, நகைகள்அணிந்திருப்பது, வீட்டின் பூஜை அறையில் கட்டுகட்டாக பணத்தை வைத்து பூஜை செய்வது போன்ற விடியோ காட்சிகளை தனது யூ டியூப் சேனலில் மதுமிதா பதிவிட்டுள்ளாா்.

எனவே, அவரது யூடியூப் சேனலை பின்தொடா்பவா்கள் திருட்டில் ஈடுபட்டிருக்கலாம் என்ற கோணத்திலும் போலீஸாா் விசாரித்து வருகின்றனா்.