சாலையை சீரமைக்கக் கோரி மதிமுக சாா்பில் பாவூா்சத்திரத்தில் ஆா்ப்பாட்டம்

பாவூா்சத்திரம் காய்கனி மாா்க்கெட் - ஆவுடையானூா் சாலையை சீரமைக்கக் கோரி ஆா்ப்பாட்டம் நடத்தவுள்ளதாக, தென்காசி தெற்கு மாவட்ட மதிமுக செயலா் இராம. உதயசூரியன் தெரிவித்துள்ளாா்.

இதுதொடா்பாக அவா் வெளியிட்ட அறிக்கை: தென்காசி- திருநெல்வேலி நெடுஞ்சாலையிலிருந்து பாவூா்சத்திரம் காமராஜா் தினசரிச் சந்தை வழியாக ஆவுடையானூா் செல்லும் சாலை ஊராட்சி ஒன்றியச் சாலையாக இருந்து வந்தது.

கனரக வாகனங்கள் அதிக பாரத்துடன் இயக்கப்படுவதால் இந்தச் சாலை அமைக்கப்பட்ட சில மாதங்களுக்குள்ளாகவே பழுதாது. இதனால், பொதுமக்கள், வாகன ஓட்டிகள் மிகுந்த அவதிக்குள்ளாகினா்.

அதையடுத்து, 2022ஆம் ஆண்டு இந்த சாலை நெடுஞ்சாலைத் துறைக்கு ஒப்படைக்கப்பட்டது. 2 ஆண்டுகள் கடந்த நிலையிலும் நெடுஞ்சாலைத் துறை ஆணை வெளியிடாததால் பராமரிப்புப் பணிகள் எதுவுமின்றி அந்தச் சாலை இப்போது மிகவும் மோசமான நிலையில் உள்ளது.

மாநில அரசு இந்த சாலைப் பணியை நபாா்டு திட்டத்தில் மேற்கொள்ள முடிவெடுத்து, மதிப்பீடு தயாரித்து ஓராண்டு ஆகியும் அதற்கான அனுமதியை நெடுஞ்சாலைத் துறை வழங்கவில்லை. இதனால், பணிகள் தொடங்கவில்லை. எனவே, இந்த சாலைப் பணியை விரைவாக மேற்கொள்ள அரசின் கவனத்தை ஈா்க்கும் வகையில் மதிமுக சாா்பில் பாவூா்சத்திரத்தில் கவன ஈா்ப்பு ஆா்ப்பாட்டம் நடைபெறவுள்ளது என்றாா் அவா்.