தென்காசி அஞ்சலகத்தில் வெளிநாடுகளுக்கு ஏற்றுமதி பாா்சல்கள் அனுப்பும் வசதி

தென்காசி தலைமை அஞ்சலகத்தில் வெளிநாடுகளுக்கு பாா்சல்கள் அனுப்புவதற்கான ஏற்றுமதி மையம் செயல்பட்டு வருகிறது.

இதுகுறித்து கோவில்பட்டி அஞ்சல் கோட்ட கண்காணிப்பாளா் செ. சுரேஷ் குமாா் வெளியிட்ட செய்திக்குறிப்பு:

கோவில்பட்டி அஞ்சல் கோட்டத்தின்கீழ் உள்ள தென்காசி தலைமை அஞ்சலகத்தில், வெளிநாட்டு ஏற்றுமதியாளா்களுக்கான அஞ்சலக ஏற்றுமதி மையம் செயல்பட்டு வருகிறது. இந்த மையம், ஏற்றுமதி தொடா்பான சேவைகளை வழங்குவதன் மூலம் வணிகங்களின் செயல்திறனை அதிகரிக்கவும், செலவுகளைக் குறைக்கவும், ஏற்றுமதி முயற்சிகளில் சுமூகமான செயல்பாடுகளை உறுதிப்படுத்தவும் உதவுகிறது.

வெளிநாடுகளுக்கு பாா்சல் அனுப்ப விரும்பும் ஏற்றுமதியாளா்கள் தாங்கள் ஏற்றுமதி செய்யும் பாா்சல்களின் விவரங்களைத் தாங்களே எளிமையான முறையில் ஆன்லைனில் உள்ளீடு செய்தபின் தென்காசி தலைமை அஞ்சலகம் மூலமாக வெளிநாடுகளுக்கு அனுப்பலாம்.

மேலும் புக்கிங் குறித்த விவரங்களை ஆன்லைனிலேயே வெளிநாடு போஸ்ட் அலுவலகத்திற்கு அனுப்பி வைக்கும் வசதியும் இதில் அடங்கும்.

வெளிநாடுகளுக்கு ஏற்றுமதி பாா்சல்கள் அனுப்புவது தொடா்பான விவரங்களுக்கு அஞ்சல் துறையின் வணிக மேலாளரை 7904420532 என்ற எண்ணில் தொடா்பு கொள்ளலாம் என்றாா்.