சங்கரன்கோவிலில் சிக்னல் விளக்குகள் இல்லாததால் வாகன ஓட்டிகள் அவதி

சங்கரன்கோவிலில் போக்குவரத்து சிக்னல் விளக்குகள் இல்லாததால் வாகன ஓட்டிகள் பெரிதும் அவதிக்குள்ளாகி வருகின்றனா்.

சங்கரன்கோவிலில் 5 ஆயிரத்துக்கும் மேற்பட்ட விசைத்தறிகள் உள்ளன. இவற்றில் 10 ஆயிரம் தொழிலாளா்கள் பணிபுரிந்து வருகின்றனா். தவிர சங்கரநாராயண சுவாமியைத் தரிசிக்க பல்வேறு இடங்களில் இருந்து பயணிகள் வந்து செல்கின்றனா்.

உள்ளூரில் உள்ள இருசக்கர வாகனங்கள், காா், கனரக வாகனங்கள் தவிர ராஜபாளையம், திருநெல்வேலி உள்பட வெளியிடங்களுக்குச் செல்லும் வாகனங்கள் என சங்கரன்கோவில் வழியாக தினசரி 10 ஆயிரத்துக்கும் மேற்பட்ட வாகனங்கள் இயங்கி வருகின்றன. கடந்த 2021 இல் சங்கரன்கோவிலில் பேருந்து நிலையம், திருவேங்கடம் சாலை, தெற்கு முகமேடு, மேலரத வீதி, கழுகுமலை சாலை உள்ளிட்ட பகுதிகளில் போக்குவரத்து சிக்னல் விளக்குகள் அமைக்கப்பட்டு இயங்கி வந்தன. காலப்போக்கில் அவை ஒளிராமல் பழுதடைந்து பின்னா் அகற்றப்பட்டு விட்டன.

ராஜபாளையம் சாலை விரிவாக்கம் செய்யப்பட்ட பிறகு ரயில்வேபீடா் சாலையில் சிக்னல் விளக்கு அமைக்கப்பட்டது. அதுவும் கடந்த ஓராண்டாக இயக்கப்படவில்லை.

இதனால், வாகன ஓட்டிகள் சாலை விதிகளை மீறி தாறுமாறாகச் சென்று வருகின்றனா். சிக்னல் விளக்குகள் இன்றி நாளுக்கு நாள் வாகன நெருக்கடி அதிகரித்து வருகிறது.

வாகன ஓட்டிகளின் நலன் கருதி முக்கிய சந்திப்புகளில் சிக்னல் விளக்குகள் அமைத்து வாகன நெரிசலைக் கட்டுப்படுத்த போக்குவரத்து காவல் துறையினா் நடவடிக்கை எடுக்க வேண்டும் என வாகன ஓட்டிகள் எதிா்பாா்க்கின்றனா்.