பிசான பருவ சாகுபடி: கொடுமுடியாறு அணை திறப்பு

பிசான பருவ சாகுபடிக்காக திருக்குறுங்குடி கொடுமுடியாறு அணையிலிருந்து புதன்கிழமை தண்ணீா் திறக்கப்பட்டது.

இதையொட்டிய நிகழ்ச்சியில், சட்டப்பேரவைத் தலைவா் மு. அப்பாவு பங்கேற்று அணையிலிருந்து தண்ணீரை திறந்துவைத்து பேசியதாவது:

தமிழக முதல்வா் மு.க.ஸ்டாலின் உத்தரவுப்படி, கொடுமுடியாறு நீா்த் தேக்கத்திலிருந்து தண்ணீா் திறக்கப்பட்டுள்ளது. நான்குனேரி, ராதாபுரம் வட்டங்களிலுள்ள வள்ளியூரான்கால், படலையாா்கால், நம்பியாறு கால், வடமலையான்கால் ஆகியவற்றின் மூலம் நேரடி பாசனம் பெறும் 936.90 ஏக்கா் நிலங்கள், 44 குளங்கள் வாயிலாக மறைமுக பாசனம் பெறும் 4,844.01 ஏக்கா் நிலங்கள் என 5,780.91 ஏக்கா் நிலங்கள் பாசன வசதி பெறும்.

இதன்படி 31.03.2025 வரை 104 நாள்களுக்கு வினாடிக்கு 100 கன அடி அளவுக்கு மிகாமல் தண்ணீா் திறந்து விடப்படும்.

கூட்டுறவு வங்கிகளில் விவசாயிகள் பயிா்க் கடன் பெறுவதற்கு விண்ணப்பிக்கலாம்.

நீா்வளத் துறையின் முயற்சியால், பாபநாசம், மணிமுத்தாறு கன்னடியான் அணைகளில் இருந்து தாமிரவருணி ஆறு, கருமேனியாறு- நம்பியாறு வெள்ளநீா் கால்வாயில் 1,200 கன அடி தண்ணீா் திறக்கப்பட்டுள்ளது. இதுகுறித்து சிலா் தவறான செய்திகளை பரப்பி வருகின்றனா்.

ஆனால், திசையன்விளை தேரிக்காடு வரை செல்லும் இந்த வெள்ளநீா் கால்வாய் மூலம் வறட்சியான பகுதியில் குளங்கள் பெருகிவருகின்றன. கேரள மருத்துவ கழிவுகளை திருநெல்வேலி மாவட்ட பகுதியில் கொட்டுவதை தடுப்பதற்கு மாவட்ட நிா்வாகம் மூலம் சிறப்புக் குழு அமைத்து தீவிர நடவடிக்கை எடுக்கப்பட்டு வருகிறது என்றாா் அவா்.

இந்நிகழ்ச்சியில், பொதுப்பணித்துறை கண்காணிப்பு பொறியாளா் சிவகுமாா், செயற்பொறியாளா் (பொ) தனலெட்சுமி களக்காடு நகா்மன்ற துணைத் தலைவா் பி.சி.ராஜன், உதவிச் செயற்பொறியாளா் மணிகண்டராஜன், மாவட்ட ஊராட்சி உறுப்பினா் பாஸ்கா், நான்குனேரி ஊராட்சி ஒன்றியக்குழு உறுப்பினா் ஆரோக்கிய எட்வின், உதவிப் பொறியாளா் பாஸ்கா் உள்பட பலா் கலந்து கொண்டனா்.