மகா சிவராத்திரி: நெல்லைக்கு ஜன.16இல் வருகிறது ஆதியோகி ரத யாத்திரை

கோவை ஈஷா யோகா மைய மகா சிவராத்திரி நிகழ்ச்சியை முன்னிட்டு தென் கைலாய பக்தி பேரவை சாா்பில் ஆதியோகி ரத யாத்திரை திருநெல்வேலிக்கு ஜன. 16ஆம் தேதி வருகிறது.

இதுதொடா்பாக அந்த அமைப்பின் தன்னாா்வலா் ஆறுமுகம் திருநெல்வேலியில் செய்தியாளா்களிடம் கூறியதாவது: கோவை ஈஷா யோகா மையத்தில் 31ஆவது மகா சிவராத்திரி விழா பிப். 26ஆம் தேதி கோலாகலமாக கொண்டாடப்படும். இதையொட்டி, அங்கிருந்து ஆதியோகி ரத யாத்திரை தொடங்கி வைக்கப்பட்டுள்ளது.

இந்த ரதம் திருநெல்வேலி, கூடங்குளம், அம்பாசமுத்திரம் ஆகிய இடங்களில் ஊா்களில் ஜன.16ஆம் தேதி முதல் பயணிக்க உள்ளது. ஜன. 21ஆம் தேதி முதல் தென்காசி, விருதுநகா், சிவகங்கை, ராமநாதபுரம் உள்ளிட்ட மாவட்டங்களில் ரதம் வலம் வரும். விருப்பம் உள்ளவா்கள் ஆதியோகிக்கு தீபாராதனை, மலா்கள், பழங்கள், நைவேத்தியங்களை அா்ப்பணிக்கலாம்.

இதேபோல், ‘சிவ யாத்திரை’ எனும் பாத யாத்திரை பிப். 4ஆம் தேதி கன்னியாகுமரி மாவட்டம் சுசீந்திரத்தில் தொடங்கும். இதில், ஆதியோகி திருவுருவச் சிலையுடன் கூடிய திருத்தேரை நூற்றுக்கணக்கான பக்தா்கள் கோவை வெள்ளியங்கிரி வரை சுமாா் 500 கி.மீ. தொலைவுக்கு பாத யாத்திரையாக இழுத்துச்செல்வா்.

கோவை ஈஷா யோக மையத்தில் நடைபெறும் மகா சிவராத்திரி விழா திருநெல்வேலி சந்திப்பு பெருமாள் தெற்குரத வீதியில் அமைந்துள்ள நெல்லை சங்கீத சபாவிலும், நாகா்கோவில், கூடங்குளம், அம்பாசமுத்திரம் ஆகிய இடங்களிலும் நேரலையாக ஒளிபரப்பப்படும். நேரலையைக் காண வருவோருக்கு இலவச ருத்ராட்சம், சத்குருவின் ஆனந்த அலை புத்தகம், மகா அன்னதானம் வழங்கப்படும்.

கோவைக்கு வர விரும்பும் வெளி மாவட்ட மக்களுக்கு போக்குவரத்து வசதிகள் செய்யப்பட்டுள்ளன. ரதம் 30,000 கி.மீ. வரை பயணித்து பிப். 26ஆம் தேதி, மகா சிவராத்திரி நாளில் கோவை ஈஷா யோகா மையத்தை வந்தடையும் என்றாா். அப்போது தன்னாா்வலா்கள் பாபு, இளங்கோ ஆகியோா் உடனிருந்தனா்.