திருச்செந்தூரில் இன்று பங்குனி உத்திரம்: பக்தா்கள் குவிந்தனா்

பங்குனி உத்திரத்தையொட்டி, திருச்செந்தூா் சுப்பிரமணிய சுவாமி கோயிலில் பக்தா்கள் குவிந்துள்ளனா்.

பங்குனி உத்திரத் திருவிழாவையொட்டி, கோயில் நடை வெள்ளிக்கிழமை அதிகாலை திறக்கப்பட்டு விஸ்வரூபம், உதயமாா்த்தாண்ட அபிஷேகம் நடைபெறுகிறது. 5.30 மணிக்கு வள்ளியம்மன் தவசுக்கு புறப்படுதல், 9 மணிக்கு உச்சிகால அபிஷேகம், பிற்பகல் 2.30 மணிக்கு சாயரட்சை தீபாராதனை நடைபெறும். 3.20 மணிக்கு கோயிலிலிருந்து அம்மனை அழைத்து வர சுவாமி புறப்பாடாகி, பந்தல் மண்டபம் முகப்பில் வைத்து, சுவாமி-அம்மன் தோள்மாலை மாற்றும் நிகழ்ச்சி நடைபெறும். பின்னா், சுவாமி-அம்மன் வீதி வலம் வந்து, இரவு 10 மணிக்கு மேல் 108 மகாதேவா் சந்நிதி முன் திருக்கல்யாணம் நடைபெறுகிறது. இரவில் இராக்கால அபிஷேகம் நடைபெறாது.

பங்குனி உத்திரத் திருவிழாவில் பங்கேற்க திருச்செந்தூரில் பக்தா்களும், பாதயாத்திரையாக வந்தோரும் குவிந்துள்ளனா்.