சாலையை சீரமைக்கக் கோரி வட்டன்விளை மக்கள் மறியல் முயற்சி

பரமன்குறிச்சி அருகே வட்டன்விளையில் மழை வெள்ளத்தால் பாதிக்கப்பட்ட சாலையை சீரமைக்க கோரி கிராமக்கள் சாலை மறியலில் ஈடுபட முயன்றனா். தூத்துக்குடி மாவட்டத்தில் கடந்த டிசம்பரில் பெய்த கனமழையால் உடன்குடி அருகே சடையநேரி குளத்தில் உடைப்பு ஏற்பட்டதில் வட்டன்விளை கிராமம் தனித்தீவு போல ஆனது. அங்குள்ள தேவாலயத்தின் சிறிய பகுதி வழியாக மட்டுமே மக்கள் பிற ஊா்களுக்கு சென்று வந்தனா்.இரண்டு மாதங்களுக்கும் மேலாக நீரானது வற்றாமல் மக்கள் பாதிக்கப்பட்டனா். இந்நிலையில இந்து முன்னணி அமைப்பின் மாநில துணைத்தலைவா் வி.பி.ஜெயக்குமாா்,தூத்துக்குடி தெற்கு மாவட்ட பாஜக பொதுச்செயலா் இரா.சிவமுருகன் ஆதித்தன் ஆகியோா் தலைமையில் சுமாா் நூறுக்கும் மேற்பட்ட கிராம மக்கள் திரண்டு பரமன்குறிச்சி- மெஞ்ஞானபுரம் பிரதான சாலையில் சாலை மறியல் செய்ய திரண்டு வந்தனா்.அவா்களிடம் நெடுஞ்சாலைத்துறை அதிகாரிகள்,காவல் துறையினா் பேச்சுவாா்த்தை நடத்தி உடனடியாக கனரக வாகனம் கொண்டு வரப்பட்டு சாலை சீரமைப்பு பணி தொடங்கியது.இதையடுத்து போராட்டம் கைவிடப்பட்டது.