கோவில்பட்டி என்.இ. கல்லூரியில் சா்வதேச மாநாடு தொடக்கம்

தூத்துக்குடி மாவட்டம் கோவில்பட்டி நேஷனல் பொறியியல் கல்லூரியில் 2 நாள்கள் நடைபெறும் சா்வதேச மாநாடு வியாழக்கிழமை தொடங்கியது.

இம்மாநாட்டிற்கு கல்லூரி இயக்குநா் சண்முகவேல் தலைமை வகித்தாா். இந்திய அரசின் மின்னணு-தகவல் தொழில்நுட்ப அமைச்சகத்தின் தரப்படுத்துதல், சோதனை, தரச் சான்றளிப்பு இயக்குநரக தலைமை இயக்குநா் எம். வெள்ளைப் பாண்டி, இந்தியாவில் உள்ள தைபே பொருளாதார கலாசார மையத்தின் அறிவியல்-தொழில்நுட்ப பிரிவு இயக்குநா் லுங்-ஜீ யாங் ஆகியோா் சிறப்பு விருந்தினா்களாகக் கலந்து கொண்டு குத்து விளக்கேற்றினா். முதுநிலை டீன் நீலகண்டன் மாநாட்டின் நோக்கங்கள் மற்றும் முக்கியத்துவம் குறித்து பேசினாா்.

தொடா்ந்து, மாநாட்டின் ஆய்வு கட்டுரைகள் அடங்கிய புத்தகத்தை கல்லூரி தாளாளா் கே.ஆா். அருணாச்சலம் வெளியிட சிறப்பு விருந்தினா்கள் முதல் பிரதியை பெற்றுக் கொண்டனா்.

மாநாட்டில் ஐஐடி பாலக்காடு, ஐஐடி திருப்பதி, ஐஐஐடிடிஎம் காஞ்சிபுரம், சிஎஸ்ஐஆா் நிறுவனங்கள், நான்யாங் தொழில்நுட்ப பல்கலைக்கழகம் (சிங்கப்பூா்), தைபே பொருளாதார - கலாசார மையம், படோவா பல்கலைக்கழகம் (இத்தாலி) உள்ளிட்ட முன்னணி நிறுவனங்களைச் சோ்ந்த புகழ்பெற்ற வல்லுநா்கள், எல்டிஐ மைண்ட்ரீ மற்றும் ஃ பொ்மி சிலிக்கான் டிசைன்ஸ் நிறுவனங்களைச் சாா்ந்த வல்லுநா்கள் கலந்து கொண்டனா்.

இந்தியா மற்றும் வெளிநாடுகளில் இருந்து 393 ஆய்வு கட்டுரைகள் மாநாட்டில் பெறப்பட்டன. சிறந்த மதிப்பாய்வு செயல்முறைக்குப் பிறகு 109 கட்டுரைகள் பட்டியலிடப்பட்டு 63 கட்டுரைகள் சமா்ப்பிப்பிற்காக தோ்ந்தெடுக்கப்பட்டன.