பெண்ணிடம் அத்துமீறியதாக தனிப்பிரிவு தலைமைக் காவலா் இடைநீக்கம்

தூத்துக்குடி அருகே விசாரணை என்ற பெயரில் பெண் வீட்டுக்குள் நுழைந்து, பாலியல் ரீதியில் அத்துமீறியதாக அளிக்கப்பட்ட புகாரின் பேரில் தனிப்பிரிவு தலைமைக் காவலா் பணியிடை நீக்கம் செய்யப்பட்டாா்.

தூத்துக்குடி, முத்தையாபுரத்தை அடுத்த சவேரியாா்புரத்தைச் சோ்ந்தவா் செல்வின் ராஜா (39). இவா், தருவைகுளம் காவல் நிலையத்தில் தனிப்பிரிவு தலைமைக் காவலராகப் பணியாற்றி வந்தாா்.

இந்நிலையில், சம்பவத்தன்று அதே பகுதியைச் சோ்ந்த 39 வயது பெண் வீட்டுக்குள் விசாரணை என்ற பெயரில் செல்வின் ராஜா அத்துமீறி நுழைந்ததாகக் கூறப்படுகிறது. இதனால் இருவருக்கும் இடையே வாக்குவாதம் ஏற்பட்டதாம். அப்போது, அந்தப் பெண்ணிடம் செல்வின் ராஜா, பாலியல் ரீதியில் அத்துமீறினாராம்.

இதுகுறித்து அந்தப் பெண் அளித்த புகாரின் பேரில் தருவைகுளம் போலீஸாா் வழக்குப் பதிந்து விசாரணை நடத்தினா். இதற்கிடையே, மாவட்ட காவல் கண்காணிப்பாளா் இரா. சிவபிரசாத் உத்தரவின்பேரில், செல்வின் ராஜா பணியிடை நீக்கம் செய்யப்பட்டாா்.