கோரம்பள்ளம் வரத்துக்கால்வாய் தூா்வாரும் பணி: ஆட்சியா் ஆய்வு

தூத்துக்குடி, கோரம்பள்ளம் வரத்துக்கால்வாய் தூா்வாரும் பணிகளை மாவட்ட ஆட்சியா் விஷு மகாஜன் செவ்வாய்க்கிழமை பாா்வையிட்டு ஆய்வு செய்தாா்.

தூத்துக்குடி மாவட்டம், அய்யனடைப்பு ஊராட்சியில் ஏ. கைலாசபுரம் முதல் செங்குளம் ஊருணி வரை 1,800 மீட்டா் நீளமுள்ள நீா்வரத்துக் கால்வாயில், ரூ. 1.13 லட்சத்தில் வண்டல் மண் அகற்றும் பணி நடைபெற்று வருகிறது.

கோரம்பள்ளம் ஊராட்சியில் சுப்பிரமணியபுரம் முதல் ஊராட்சி மன்ற அலுவலகம் பின்புறம் வரை 1,575 மீட்டா் நீளமுள்ள கால்வாயில் ரூ.1.98 லட்சத்தில் தூா்வாரும் பணியும், அய்யனடைப்பு ஊராட்சியில் மாவட்ட ஆட்சியா் அலுவலக சிறுபாலம் அருகேயுள்ள 1,300 மீட்டா் நீளமுள்ள பக்கிள் ஓடையில் ரூ. 3.27 லட்சத்தில் தூா்வாரும் பணியும் நடைபெற்று வருகின்றன.

கால்வாய்களில் புதா், செடி-கொடிகளை அகற்றுதல், வண்டல் மண் மற்றும் மண் சாா்ந்த பணிகள் இயந்திரங்கள் மூலம் மேற்கொள்ளப்படுவதை மாவட்ட ஆட்சியா் பாா்வையிட்டு ஆய்வு செய்தாா்.

ஆய்வின்போது, மாவட்ட ஊரக வளா்ச்சி முகமை திட்ட இயக்குநா் நா. சரவணன் உள்ளிட்ட அலுவலா்கள் உடனிருந்தனா்.