அரியலூரில் குறைதீர் கூட்டம்: ரூ.2.23 கோடியில் நலத் திட்ட உதவிகள்

அரியலூரில் திங்கள்கிழமை நடைபெற்ற பொதுமக்கள் குறைதீர்க்கும் நாள் கூட்டத்தில் பயனாளிகளுக்கு ரூ. 2.23 கோடியில் நலத்திட்ட உதவிகளை ஆட்சியர் எ. சரவணவேல்ராஜ் வழங்கினார்.

கூட்டத்தில், அரியலூர், செந்துறை, ஜயங்கொண்டம் வட்டங்களைச் சேர்ந்த 329 பயனாளிகளுக்கு ரூ. 32.90 லட்சம் மதிப்பிலான விலையில்லா வீட்டுமனைப் பட்டாக்களை ஆட்சியர் வழங்கினார். மேலும், 11 மாற்றுத்திறனாளிகளுக்கு தலா ரூ. 5 ஆயிரம் மதிப்புள்ள விலையில்லா தையல் இயந்திரங்கள், கீழப்பழூவூர், திருமழபாடி, பெரியதிருக்கோணம், அழகாபுரம், மருதூர் தொடக்க வேளாண் கூட்டுறவு கடன் சங்கங்களின் சார்பில், 223 உறுப்பினர்களுக்கு ரூ. 59.94 லட்சம் பயிர்க்கடனுக்கான காசோலை, தமிழ்நாடு மாநில ஊரக வாழ்வாதார இயக்கம் சார்பில் 20 மகளிர் சுய உதவிக் குழுக்களுக்கு ரூ. 50.19 லட்சம் கடனுதவிக்கான காசோலை, புதுவாழ்வு திட்டத்தின் சார்பில், 43 மகளிர் குழுக்கள் மற்றும் சிறப்பு சுய உதவிக் குழுக்களுக்கு வங்கிகள் மூலம் நேரடிக் கடனுதவி ரூ. 80.30 லட்சம், 6 குறுவட்டங்களைச் சேர்ந்த 16 பேருக்கு உட்பிரிவுக்கான ஆணை என மொத்தம் 664 பயனாளிகளுக்கு ரூ. 2.23 கோடியில் நலத்திட்ட உதவிகளை ஆட்சியர் வழங்கினார்.

முன்னதாக, மாவட்ட ஊரக வளர்ச்சி முகமையின் சார்பில் தனிநபர் கழிப்பறை குறித்த விழிப்புணர்வு துண்டுப் பிரசுரங்களை பொதுமக்களிடம் மாவட்ட ஆட்சியர் வழங்கினார்.

கூட்டத்தில் பல்வேறு கோரிக்கைகள் அடங்கிய 500 மனுக்களை பொதுமக்களிடமிருந்து பெற்ற ஆட்சியர், அவற்றின்மீது சம்பந்தப்பட்ட அலுவலர்கள் உடனடி நடவடிக்கை எடுக்க உத்தரவிட்டார். கூட்டத்தில், ஊரக வளர்ச்சி முகமை திட்ட இயக்குநர் சரஸ்வதி கணேசன், மாவட்ட மாற்றுத்திறனாளி நல அலுவலர் குமார், கூட்டுறவுச் சங்கங்களின் துணைப் பதிவாளர்கள் எல்.வி. சந்திரசேகரன், செல்வராஜ், கூட்டுறவு சார் பதிவாளர் புகழேந்தி உள்ளிட்டோர் பங்கேற்றனர்.