விளையாட்டுப் போட்டிகளில் வென்றவர்களுக்கு பரிசளிப்பு

அரியலூர் மாவட்ட விளையாட்டு அரங்கில், நடைபெற்ற மாதாந்திர விளையாட்டுப் போட்டிகளில் வெற்றி பெற்றவர்களுக்கு செவ்வாய்க்கிழமை பரிசுகள் வழங்கப்பட்டன.
தமிழ்நாடு விளையாட்டு மேம்பாட்டு ஆணையம் சார்பில் தடகளம், நீளம், உயரம் தாண்டுதல், குண்டு எறிதல், நீச்சல், கைப்பந்து, ஹாக்கி உள்ளிட்ட போட்டிகள் செவ்வாய்க்கிழமை நடைபெற்றது. போட்டியை மாவட்ட விளையாட்டு மற்றும் இளைஞர் நல  அலுவலர் ராமசுப்ரமணிய ராஜா தொடக்கி வைத்தார்.
வயது வரம்பின்றி நடத்தப்பட்ட இப்போட்டிகளில் மாவட்டம் முழுவதிலும் இருந்து 420 ஆண், 280  பெண்கள் பங்கேற்றனர். போட்டியில் வெற்றி பெற்றவர்களுக்கு மாவட்ட உடற்கல்வி ஆய்வாளர் ராஜேந்திரன் பரிசுகள் வழங்கினார். முன்னதாக, ஹாக்கி பயிற்றுநர் ந.லெனின் வரவேற்றனர். முடிவில் பளுதூக்கும் பயிற்றுநர் ஆர்.சதீஷ் நன்றி கூறினார்.