சொத்துத் தகராறு: இளைஞர் கைது

அரியலூர் மாவட்டம் உடையார்பாளையம் அருகே முன்விரோதம் காரணமாக ஏற்பட்ட தகராறில் ஒருவர் காயமடைந்தார். தாக்கியவரைப் போலீஸார் திங்கள்கிழமை நள்ளிரவு கைது செய்தனர்.
உடையார்பாளையம் அருகேயுள்ள வடகடல் கிராமத்தைச் சேர்ந்தவர் செந்தில்குமார் மகன் ராதா (40). இவருக்கும், அதே பகுதியைச் சேர்ந்த ராமசாமி மகன் பாண்டியனுக்கும் (45) சொத்துப் பிரச்னை காரணமாக முன்விரோதம் இருந்து வந்துள்ளது. இந்நிலையில், திங்கள்கிழமை இருவருக்கும் ஏற்பட்ட பிரச்னையில் ராதாவைப் பாண்டியன் தாக்கியுள்ளார். 
இதில், காயமடைந்த ராதா அரியலூர் அரசு மருத்துவமனையில் சிகிச்சை பெற்று வருகிறார். புகாரின் பேரில் உடையார்பாளையம் போலீஸார் வழக்கு பதிந்து பாண்டியனைக் கைது செய்தனர்.