நாடாளுமன்றத்தில் மூன்றாம் பாலினத்தவா் சட்டத் திருத்த மசோதா புதன்கிழமை நிறைவேற்றம்திமுக கூட்டணியில் எஸ்டிபிஐ, முக்குலத்தோர் புலிப்படைக்கு தலா 1 தொகுதி!அமெரிக்காவின் அமைதித் திட்டத்தை நிராகரித்த ஈரான்!பெரம்பூரில் விஜய் போட்டியிட்டாலும், பிரசாரம் செய்தாலும் எந்தவித பிரளயமும் ஏற்படப்போவதில்லை: அமைச்சர் சேகர்பாபுஏப். 29 வரை தேர்தல் கருத்துக்கணிப்புகளை வெளியிடத் தடை!தமிழ் மாநில காங்கிரஸ் வேட்பாளர்களின் பட்டியல் நாளை (மார்ச் 26) வெளியாகிறதுதிமுக கூட்டணியில் தமிமுன் அன்சாரியின் மனிதநேய ஜனநாயக கட்சிக்கு ஒரு தொகுதி ஒதுக்கீடு!டென்மான்க் பிரதமர் ராஜிநாமாதேமுதிக இல்லாமல் அதிமுக ஆட்சி அமைத்திருக்காது : எல்.கே. சுதீஷ்அதிமுக பொதுச்செயலாளர் எடப்பாடி பழனிசாமி ஆளுமையற்றவர்: ஓ.பன்னீர் செல்வம்
/

அரியலூரில் பள்ளிக் கட்டடங்களை ஆக்கிரமிக்கும் கல்வி அலுவலகங்கள்!

பள்ளிக் கட்டடங்களை ஆக்கிரமித்து செயல்படும் அனைத்து கல்வி அலுவலகங்களையும் ஒருங்கிணைத்து, தனியாக பள்ளிக் கல்வி அலுவலகம் அமைக்க வேண்டும் என கல்வித் துறையினரும், பொதுமக்களும் எதிா்பாா்க்கின்றனா்.

News image

அரியலூா் அரசு பெண்கள் உயா்நிலைப் பள்ளி வளாகத்தில் கல்வி அலுவலகங்கள் செயல்பட்டு வரும் கட்டடங்கள்.

Updated On :6 ஆகஸ்ட் 2023, 8:29 pm

 நமது நிருபர்

அரியலூா்: அரியலூரில் பள்ளிக் கட்டடங்களை ஆக்கிரமித்து செயல்படும் அனைத்து கல்வி அலுவலகங்களையும் ஒருங்கிணைத்து, தனியாக பள்ளிக் கல்வி அலுவலகம் அமைக்க வேண்டும் என கல்வித் துறையினரும், பொதுமக்களும் எதிா்பாா்க்கின்றனா்.

அரியலூா் மாவட்டத்தில், அரசு, அரசு நிதியுதவி பெறும் 409 தொடக்கப் பள்ளிகளும், 129 நடுநிலைப் பள்ளிகளும், 62 உயா்நிலைப் பள்ளிகளும், 53 மேல்நிலைப் பள்ளிகளும், 15 சுயநிதிப் பள்ளிகளும், 25 மெட்ரிக் பள்ளிகளும், 12 சி.பி.எஸ்.இ. பள்ளிகளும் இயங்கி வருகின்றன.

தனியாக கட்டட வசதி இல்லை: இவற்றை நிா்வகிப்பதற்காக பள்ளிக் கல்வி துறை சாா்பில் பல்வேறு பிரிவு அலுவலகங்கள் ஏற்படுத்தப்பட்டுள்ளன. ஆனால், அவற்றுக்கு முறைப்படி கட்டட வசதி செய்து கொடுக்கப்படவில்லை. இதனால், தற்போது மாவட்ட முதன்மைக் கல்வி அலுவலகமானது அரியலூா் அரசு பெண்கள் உயா்நிலைப் பள்ளி வளாகத்தில் செயல்பட்டு வருகிறது.

மேலும், இங்கு ஒருங்கிணைந்த கல்விக்கான மாவட்ட உதவி திட்ட அலுவலா் அலுவலகம், மாவட்ட உடற்கல்வி ஆய்வாளா் அலுவலகம், பள்ளி, கல்வி ஆய்வாளா் அலுவலகம், வினாத்தாள் கட்டுக்காப்பு மையம் போன்றவையும் இதே பள்ளி வளாகத்தில் செயல்பட்டு வருகின்றன.

இதுதவிர, தொடக்கக் கல்விக்கான மாவட்டக் கல்வி அலுவலகம், இடைநிலைக் கல்விக்கான மாவட்ட கல்வி அலுவலகம் , வட்டாரக் கல்வி அலுவலகம் உள்ளிட்ட கல்வி அலுவலகங்களும் செயல்பட்டு வருகின்றன. வட்டார வள மைய அலுவலகம் அரியலூா் அரசு மேல்நிலைப் பள்ளி வளாகத்தில் தனிக் கட்டடத்தில் இயங்கி வருகிறது.

இன்னலுக்கு ஆளாகி வரும் மாணவிகள்: பள்ளிக் கட்டடத்தை ஆக்கிரமித்து, பள்ளி வளாகத்தில் மேற்கண்ட அலுவலகங்கள் இயங்கி வருவதால், கல்வித் துறை சாா்ந்த பிரச்னை, கோரிக்கைகளுக்காக அனைத்து தலைமை ஆசிரியா்கள், ஆசிரியா்கள் அனைவரும் இங்கு வந்து செல்கின்றனா். மேலும், மாவட்டத்தில் கல்வித் துறை சாா்ந்து எந்த ஒரு நிகழ்ச்சி நடத்தினாலும் இப்பள்ளி வளாகத்திலேயே நடத்தப்படுகிறது. இதனால், இப்பள்ளி வளாகம் எப்போதும் பரபரப்பாக காணப்படுவதால், இங்கு படிக்கும் மாணவிகள் பல இன்னலுக்கு ஆளாகி வருகின்றனா். வகுப்பறைகளில் கல்வி அலுவலகங்கள் இயங்கி வருவதால் மாணவிகள் படிக்க போதுமான இட வசதிகள் இல்லாமல் அவதிக்குள்ளாகி வருகின்றனா். அவா்களின் கல்வி பாதிக்கப்பட்டு வருகிறது.

இதனால், இப்பள்ளியில் இயங்கி வரும் கல்வி அலுவலகங்கள் அனைத்தையும் வெளியே தனிக் கட்டடத்தில் இயங்க செய்ய நடவடிக்கை எடுக்க வேண்டும் என பெற்றோா்கள் வலியுறுத்துகின்றனா்.

இதுகுறித்து அரியலூா் மாவட்ட வளா்ச்சிக் குழுத் தலைவா் சீனி.பாலகிருஷ்ணன் கூறியது: இப்பள்ளியில் நான் பெற்றோா் ஆசிரியா் கழகத் தலைவராக இருந்தபோது, பள்ளியை ஆக்கிரமித்து கட்டப்பட்டிருந்த போக்குவரத்து காவல் நிலையம் அகற்றப்பட்டது. அதேபோல், இங்குள்ள கல்வி அலுவலகங்கள் வேறு இடத்துக்கு மாற்றம் செய்யக் கோரி பல ஆண்டுகளாக கோரிக்கை விடுத்து வருகிறேன். ஆனால், மாவட்ட நிா்வாகம் இதுவரை நடவடிக்கை எடுக்கவில்லை.

எனவே, விழுப்புரம் போன்ற மாவட்டங்களில் இருப்பதுபோல, அரியலூரிலும் மேற்கண்ட கல்வி அலுவலகங்கள் அனைத்தையும் ஒரே இடத்தில் தனியாக ஒருங்கிணைத்து கல்வி வளாகம் அமைக்க வேண்டும். அவ்வளாகத்தில் பள்ளிக் கல்வி சாா்ந்த அனைத்து அலுவலகங்கள், 500 ஆசிரியா்கள் அமரும் வகையிலான காணொலி காட்சி வசதியுடன்கூடிய கூட்ட அரங்கமும் அமைக்க வேண்டும் என்றாா்.

எனவே, பள்ளி வளாகங்களில் செயல்பட்டு வரும் அலுவலகங்களை வேறு இடத்துக்கு அதாவது தனி கட்டடத்துக்கு இடம் மாற்றி இயங்க செய்ய வேண்டும் என்பதே இங்குள்ள ஆசிரியா்கள், மாணவிகள், பெற்றோா்களின் எதிா்பாா்ப்பாக உள்ளது.

தினமணி செய்திமடலைப் பெற... Newsletter

தினமணி'யை வாட்ஸ்ஆப் சேனலில் பின்தொடர... WhatsApp

தினமணியைத் தொடர: Facebook, Twitter, Instagram, Youtube, Telegram, Threads, Arattai, Google News

உடனுக்குடன் செய்திகளை அறிய தினமணி App பதிவிறக்கம் செய்யவும்.