வளர்ச்சிப் பணிகளை விரைந்து முடிக்க அறிவுறுத்தல்

வளர்ச்சித் திட்டப் பணிகளை தரத்துடன் உரிய காலத்தில் முடித்து மக்கள் பயன்பாட்டுக்கு கொண்டுவர வேண்டும் என அலுவலர்களுக்கு அறிவுறுத்தினார் மாவட்ட ஆட்சியர் த. அன்பழகன்.
கரூர் மாவட்டம், கிருஷ்ணராயபுரம் ஊராட்சி ஒன்றியத்தில் நடைபெறும் பல்வேறு வளர்ச்சித் திட்டப் பணிகளை புதன்கிழமை ஆய்வு செய்த அவர்,  முதலில் சேங்கல் பகுதியில் ஒருங்கிணைந்த உட்கட்டமைப்பு மேம்பாட்டுத் திட்டத்தின்கீழ் ரூ.13.50 லட்சத்தில் கட்டி முடிக்கப்பட்ட ஊராட்சி ஒன்றிய நடுநிலைப்பள்ளிக் கட்டடத்தை பார்வையிட்டு புதிய கட்டடத்தில் வகுப்புகளைத் தொடங்க ஆலோசனை வழங்கினார். மேலும், அப்பகுதியில் சேங்கல் முதல் மாணிக்கபுரம் வரை ரூ.1.06 கோடியில் பலப்படுத்தப்படும் தார்ச் சாலையை பார்வையிட்டு மழைநீர் தேங்காத வகையில் சாலைகளை அமைக்குமாறு பொறியாளர்களுக்கு உத்தரவிட்டார்.
வீரியபாளையத்தில் ரூ. 8.50 லட்சத்தில் அங்கன்வாடி மையக் கட்டடம் அமைக்கும் பணியை ஆய்வு செய்து குழந்தைகள் பயன்படுத்தும் அளவுக்கு கழிவறைகளை வடிவமைக்க ஆலோசனை வழங்கினார். மேலும், அப்பகுதியில் பச்சமுத்து உடையான் சிறு பாசனக் குளம் ரூ. 11.59 லட்சத்தில் சீரமைக்கப்படுவதை பார்வையிட்டு மழைக்காலங்களில் குளத்தின் கரைகள் உடைப்பு ஏற்படாமல் இருக்க பனை உள்ளிட்ட மரங்களை நட அதிகாரிகளுக்கு உத்தரவிட்டார். 
மேலும் வயலூர் ஊராட்சியில் வட்டார அளவில் மரக்கன்று நடும் திட்டத்தின்கீழ் அய்யம்பாளையம் குளத்தைச் சுற்றி ரூ. 7.18 லட்சத்தில் மரக்கன்று நடும்  பணி,  
தமிழ்நாடு ஊரகச் சாலைகள் மேம்பாட்டு திட்டத்தின்கீழ் இரும்பூதிப்பட்டி முதல் முனையனூர் வரை ரூ. 22.79 லட்சத்தில் தார்ச் சாலை அமைக்கும் பணி உள்ளிட்ட பணிகளையும் ஆய்வு செய்து, வளர்ச்சித் திட்டப்பணிகளை தரத்துடன் உரிய காலத்தில் முடித்து மக்கள் பயன்பாட்டிற்கு கொண்டு வர அலுவலர்களுக்கு அறிவுறுத்தினார். 
ஆய்வின்போது ஊரக வளர்ச்சி முகமைத் திட்ட இயக்குநர் எஸ். கவிதா, செயற்பொறியாளர் எஸ். சடையப்பன் உள்ளிட்டோர் உடனிருந்தனர்.