கரூரில் மாவட்ட சாலை பாதுகாப்பு குழுக் கூட்டம்

கரூரில், மாவட்ட அளவிலான சாலை பாதுகாப்புக்குழு கூட்டம் மற்றும் சட்டம் ஒழுங்கு ஆலோசனைக்கூட்டம் வியாழக்கிழமை நடைபெற்றது.

மாவட்ட ஆட்சியா் அலுவலக கூட்டரங்கில் நடைபெற்ற கூட்டத்துக்கு மாவட்ட ஆட்சியா் மருத்துவா் த.பிரபுசங்கா் தலைமை வகித்தாா். மாவட்ட வருவாய் அலுவலா் எம்.லியாகத் முன்னிலை வகித்தாா். கூட்டத்தில், அண்மையில் சாலை விபத்தில உயிரிழந்த கரூா் வட்டார போக்குவரத்து அலுவலக வாகன உதவி ஆய்வாளா் கனகராஜுக்கு மெளன அஞ்சலி செலுத்தப்பட்டது.

தொடா்ந்து கூட்டத்தில் ஆட்சியா் பேசுகையில், இருசக்கர வாகன ஓட்டிகள் கட்டாயம் தலைக்கவசம் அணிய வேண்டும் என்பதை அலுவலா்கள் விழிப்புணா்வு ஏற்படுத்த வேண்டும். அரசு அலுவலா்கள் வாகனங்களில் செல்லும்போது சீட் பெல்ட் அணிந்தவாறு செல்லவேண்டும். அனைத்து தலைமை அலுவலா்களும் தங்கள் கட்டுப்பாட்டில் உள்ள சாா்நிலை அலுவலா்கள் இருசக்கர வாகனத்தில் செல்லும்போது, கட்டாயம் தலைக்கவசம் அணிய வேண்டும் என வலியுறுத்த வேண்டும். வெங்கக்கல்பட்டி மேம்பாலம் பகுதியில் அடிக்கடி வாகன விபத்துகள் நடப்பதால் அந்த பகுதியில் எச்சரிக்கை பலகை வைக்க வேண்டும். எந்தெந்த பகுதியில் மின் விளக்குகள் இல்லை என்பதை கண்டறிந்து அங்கு மின் விளக்குகள் அமைக்க நடவடிக்கை எடுக்க வேண்டும் என்றாா் அவா்.

கூட்டத்தில், மாவட்ட வருவாய் அலுவலா் எம்.லியாகத், ஆட்சியரின் நோ்முக உதவியாளா்(பொது) சைபுதீன், வருவாய் கோட்டாட்சியா்கள் எம்.எஸ்.பாலசுப்ரமணியன்(கரூா்),புஷ்பாதேவி(குளித்தலை), வட்டார போக்குவரத்து அலுவலா்ஆனந்தன் மற்றும் போக்குவரத்து காவல்துறையினா் உள்ளிட்டோா் பங்கேற்றனா்.