முன்னாள் அமைச்சா் எம்.ஆா்.வருமானத்துக்கு அதிகமாக ரூ.2.68 கோடி சொத்து சோ்ப்பு: முதல் தகவல் அறிக்கையில் தகவல்

முன்னாள் அதிமுக அமைச்சா் எம்.ஆா். விஜயபாஸ்கா், வருமானத்துக்கு அதிகமாக ரூ.2.68 கோடி சொத்து சோ்த்ததாக கரூா் மாவட்ட ஊழல் தடுப்பு மற்றும் கண்காணிப்புப் பிரிவு காவல்துறையினா் தெரிவித்துள்ளனா்.

கடந்த 22-ஆம் தேதி முன்னாள் அமைச்சா் விஜயபாஸ்கரின் வீடுகள், நிறுவனங்களில் நடத்தப்பட்ட சோதனையைத் தொடா்ந்து, முதல் தகவல் அறிக்கையில் பதிவு செய்யப்பட்ட விவரங்கள் குறித்து, ஊழல் தடுப்பு மற்றும் கண்காணிப்புப் பிரிவு காவல்துறையினா் ஞாயிற்றுக்கிழமை தெரிவித்திருப்பது:

கரூா் மாவட்ட அதிமுக செயலா் எம்.ஆா். விஜயபாஸ்கா் 2016 முதல் 2021 வரை அதிமுக ஆட்சியில் போக்குவரத்துத் துறை அமைச்சராக இருந்த காலத்தில், வருமானத்துக்கு அதிகமாக சொத்து சோ்த்ததாக எழுந்த புகாரையடுத்து, ஜூலை 21 ஆம் தேதி அவா் மீதும், அவரது மனைவி விஜயலட்சுமி, சகோதரா் சேகா் ஆகியோா் மீதும் வழக்குப் பதிவு செய்யப்பட்டது.

இதைத் தொடா்ந்து ஊழல் தடுப்பு மற்றும் கண்காணிப்புப் பிரிவு காவல்துறையினரால் கரூரிலுள்ள முன்னாள் அமைச்சரின் வீடுகள், தொழில் நிறுவனங்கள், உதவியாளா் வீடுகளில் சோதனை நடத்தப்பட்டது.

இச்சோதனையில், கடந்த 2016 சட்டப்பேரவைத் தோ்தலின் போது மே 23-ஆம் தேதி விஜயபாஸ்கா் தாக்கல் செய்த சொத்து விவரம் அறியப்பட்டது. அதில் அவரது சொத்து மதிப்பு ரூ.2,51,91,378 ஆக இருந்தது.

2016 முதல் 2021வரை போக்குவரத்துத் துறை அமைச்சராக இருந்த விஜயபாஸ்கா், 2021 பேரவைத் தோ்தலைச் சந்தித்தபோது 2021, மாா்ச் 18-ஆம் தேதி அவரது சொத்து மதிப்பு தாக்கல் செய்யப்பட்ட போது அதன் மதிப்பு ரூ.8,62,35,648 ஆகும்.

2016 முதல் 2021 வரையிலான 5 ஆண்டுகளில் ரெயின்போ புளுமெட்டல்ஸ், ரெயின்போ டையா்ஸ் நிறுவனங்களால் 8 வகையான சொத்துகள் வாங்கப்பட்டுள்ளன. இதில் ரெயின்போ டையா்ஸ் சாா்பில் ரூ.2,90,81,500 மதிப்பிலான 6 சொத்துகளும், ரெயின்போ புளுமெட்டல்ஸ் சாா்பில் 4,48,24,000 ரூபாய் மதிப்பிலான 2 சொத்துகளும் வாங்கப்பட்டுள்ளன.

இவை அனைத்தும் முன்னாள் அமைச்சா் எம்.ஆா்.விஜயபாஸ்கா், அவரது மனைவி விஜயலட்சுமி, அவரது சகோதரா் சேகா் பெயரில் வாங்கப்பட்டுள்ளது. இதன்மூலம் மொத்த வரவு- செலவு, வங்கிக் கணக்கு, காப்பீட்டுப் பத்திரங்கள் என அனைத்து வரவு செலவுகளும் போக, கணக்கில் வராமல் ரூ.2,28,38,487 மதிப்புக்கு வருமானத்துக்கு அதிகமாக சொத்து சோ்த்தது சோதனையில் கண்டுபிடிக்கப்பட்டதாக முதல் தகவல் அறிக்கையில் தெரிவிக்கப்பட்டுள்ளது.

அதாவது, 2016 முதல் 2021 வரையிலான 5 ஆண்டுகளில் 55 சதவிகித அளவுக்கு சொத்துகள் அதிகம் சோ்த்துள்ளதாகவும் அதில் தெரிவிக்கப்பட்டுள்ளது.