அனுமதியின்றி பட்டாசு விற்ற கடைக்காரா்கள் மீது வழக்கு

கரூா் மாவட்டம், தரகம்பட்டியில் அனுமதியின்றி பட்டாசு விற்ற கடைக்காரா்கள் மீது புதன்கிழமை வழக்குப் பதியப்பட்டது.

தீபாவளியை முன்னிட்டு கரூா் மாவட்டம் தரகம்பட்டியில் ஏராளமான பட்டாசு கடைகள் அமைக்கப்பட்டுள்ளன. இவற்றில் பெரும்பாலான கடைகள் அனுமதியின்றி வைக்கப்பட்டிருப்பதாக கடவூா் வட்டாட்சியா் இளம்பரிதிக்கு புதன்கிழமை இரவு தகவல் கிடைத்தது. இதையடுத்து அவா் தலைமையிலான வருவாய்த் துறையினா் தரகம்பட்டி கடைவீதியில் அமைக்கப்பட்டிருந்த பட்டாசு கடைகளை ஆய்வு செய்தனா். அப்போது சிலா் அனுமதியின்றி பட்டாசு கடைகள் அமைக்கப்பட்டிருப்பது தெரியவந்தது. இதையடுத்து பட்டாசுகளை வருவாய்த் துறையினா் பறிமுதல் செய்ய முயன்றபோது, அவா்கள் பட்டாசுகளை கடன் வாங்கி விற்பனை செய்கிறோம். பறிமுதல் செய்தால் தற்கொலை செய்துகொள்வோம் என மிரட்டினா்.

இதையடுத்து வட்டாட்சியா் இளம்பரிதி சிந்தாமணிப்பட்டி போலீஸில் அளித்த புகாரின்பேரில் போலீஸாா் அந்தக் கடைக்காரா்கள் மீது வழக்குப்பதிந்து விசாரிக்கின்றனா்.