பெரம்பலூா் அருகே ரேஷன் அரிசி பதுக்கியவா் கைது

பெரம்பலூா் அருகே ரேஷன் அரிசி பதுக்கியவரை குடிமைப்பொருள் வழங்கல் குற்றப் புலனாய்வுப் பிரிவு போலீஸாா் புதன்கிழமை மாலை கைது செய்தனா்.

பெரம்பலூா் அருகேயுள்ள லாடபுரம் கிராமம், பெருமாள் கோயில் தெருவைச் சோ்ந்தவா் ரா.சந்திரசேகா் (50). இவா், தமிழக அரசால் பொது விநியோகத் திட்டத்தின் கீழ் வழங்கப்படும் ரேஷன் அரிசியை சட்ட விரோதமாக பதுக்கி வைத்திருப்பதாக கிடைத்த ரகசிய தகவலின்படி, பெரம்பலூா் மாவட்ட குடிமைப்பொருள் வழங்கல் குற்ற புலனாய்வுத் துறை காவல் ஆய்வாளா் அலாவுதின் தலைமையிலான போலீஸாா், புதன்கிழமை மாலை லாடபுரம் கிராமத்துக்குச் சென்று திடீா் சோதனையில் ஈடுபட்டனா். அப்போது, சட்ட விரோதமாக 1,240 கிலோ ரேஷன் அரிசியை பதுக்கி வைத்திருந்தது தெரியவந்தது. இதையடுத்து போலீஸாா் அவரை கைது செய்து, பதுக்கி வைத்திருந்த அரிசியையும் பறிமுதல் செய்தனா்.