கிணற்றுக்குள் விழுந்த பசு உயிருடன் மீட்பு

புதுக்கோட்டை மாவட்டம் அன்னவாசல் அருகே கிணற்றுக்குள் விழுந்த பசுவை தீயணைப்புத் துறையினர் ஞாயிற்றுக்கிழமை உயிருடன் மீட்டனர்.

அன்னவாசல் அருகே உள்ள வேளம்பட்டி அந்தமான் தோட்டத்தைச் சேர்ந்தவர் இளங்கோ. இவருக்கு சொந்தமான பசு சனிக்கிழமை முதல் காணவில்லையாம். இதையடுத்து இளங்கோ தனது பசுவை பல இடங்களில் தேடி வந்தார்.

இந்நிலையில் ஞாயிற்றுக்கிழமை அவரது தோட்டத்து கிணற்றுக்குள் இருந்து பசு கத்தும் சப்தம் கேட்டது. இதைத்தொடர்ந்து அங்கு சென்று இளங்கோ பார்த்த போது பசு சுமார் 50 அடி ஆழ கிணற்றுக்குள் விழுந்தது தெரியவந்தது. இதையடுத்து தகவலறிந்து வந்த இலுப்பூர் தீயணைப்பு நிலைய அலுவலர் சி. காமராஜ் தலைமையிலான மீட்புப் படையினர் சுமார் 2 மணி நேர போராட்டத்துக்கு பின் பசுவை உயிருடன் மீட்டனர்.