மதுக்கடையை அகற்றக் கோரிஆதார், ரேஷன் அட்டையுடன் கிராம மக்கள் போராட்டம்

புதுக்கோட்டை மாவட்ட ஆட்சியர் அலுவலகத்தில் டாஸ்மாக் மதுபானக் கடையை அகற்றக் கோரி கிராம மக்கள் ரேஷன், ஆதார் அட்டைகளுடன் திங்கள்கிழமை போராட்டத்தில் ஈடுபட்டனர்.
தொடர்ந்து நடத்தப்பட்ட பேச்சுவார்த்தையில் கடையை அகற்ற உறுதியளிக்கப்பட்டதால் கலைந்து சென்றனர்.
ஆவுடையார்கோவில் அருகே கொளுவனூர் கிராமத்தில் பொதுமக்களின் எதிர்ப்பை மீறி கடந்த மாதம் டாஸ்மாக் மதுக்கடை திறக்கப்பட்டது. அந்தக் கடையை அகற்றக் கோரி மே 3ஆம் தேதி மார்க்சிஸ்ட் கம்யூனிஸ்ட் கட்சியினர் பூட்டுப் போடும் போராட்டம் நடத்தப் போவதாக அறிவித்தனர். இதையடுத்து, வட்டாட்சியர் தலைமையில் நடைபெற்ற பேச்சுவார்த்தையில் கடையை அகற்றுவதாக உறுதியளிக்கப்பட்டதால் போராட்டம் கைவிடப்பட்டது. இதுவரை மதுக்கடையை அகற்ற அதிகாரிகள் நடவடிக்கை எடுக்கவில்லை. இதையடுத்து மார்க்சிஸ்ட் கம்யூனிஸ்ட் கட்சி மாவட்டச் செயலாளர் எஸ்.கவிவர்மன் தலைமையில் கிராம மக்கள் ரேஷன், ஆதார் அட்டைகளுடன் ஆர்ப்பாட்டம் நடத்தினர். மதுக்கடையை அகற்றப்படாததால் ரேஷன், ஆதார் அட்டைகளை ஆட்சியரிடம் ஒப்படைக்கப் போவதாக முழக்கங்கள் எழுப்பினர்.
இதைத்தொடர்ந்து, போராட்டத்தில் ஈடுபட்டவர்களிடம் பேச்சுவார்த்தை நடத்திய ஆட்சியர் சு.கணேஷ், மதுக்கடையை மூட உடனடியாக நடவடிக்கை எடுப்பதாக அளித்த உறுதியைத் தொடர்ந்து அனைவரும் கலைந்து சென்றனர்.