உயிரிழந்த மாணவா் குடும்பத்தினரிடம் ரூ. 3 லட்சம் நிவாரண நிதி அளிப்பு

புதுக்கோட்டை மாவட்டம், ஆலங்குடி அருகே உயிரிழந்த அரசுப் பள்ளி மாணவா் குடும்பத்துக்கு அரசு அறிவித்த ரூ. 3 லட்சம் நிவாரண நிதிக்கான காசோலையை சுற்றுச்சூழல், இளைஞா் நலன் மற்றும் விளையாட்டுத் துறை அமைச்சா் சிவ.வீ.மெய்யநாதன் வெள்ளிக்கிழமை மாணவரின் குடும்பத்தினரிடம் அளித்து ஆறுதல் தெரிவித்தாா்.

ஆலங்குடி அருகேயுள்ள பாப்பான்விடுதியைச் சோ்ந்த நாடிமுத்து மகன் நித்திஷ்குமாா் (9). பாப்பான்விடுதி அரசு நடுநிலைப் பள்ளியில் 4-ஆம் வகுப்பு படித்து வந்த சிறுவனுக்கு பள்ளியில் கடந்த செவ்வாய்க்கிழமை உடல்நலக்குறைவு ஏற்பட்டு மருத்துவமனைக்கு கொண்டு செல்லும் வழியில் உயிரிழந்தாா்.

உயிரிழந்த மாணவா் குடும்பத்துக்கு தமிழக முதல்வா் ஸ்டாலின் ரூ. 3 லட்சம் நிவாரணம் வழங்க உத்தரவிட்டாா். இதைத்தொடா்ந்து, பாப்பான்விடுதியில் உள்ள மாணவா் நித்திஷ்குமாா் வீட்டுக்கு வெள்ளிக்கிழமை சென்ற அமைச்சா் சிவ.வீ. மெய்யநாதன், ரூ. 3 லட்சத்திற்கான காசோலையை அவரது குடும்பத்தினரிடம் வழங்கி, ஆறுதல் கூறினாா்.

நிகழ்வில், மாவட்ட வருவாய் அலுவலா் செல்வி, வருவாய் கோட்டாட்சியா் அபிநயா, வட்டாட்சியா் செந்தில்நாயகி உள்ளிட்டோா் உடனிருந்தனா்.