லாரியில் அடிபட்டு இளைஞா் உயிரிழப்பு

விராலிமலை அருகே வெள்ளிக்கிழமை லாரியில் அடிபட்டு இளைஞா் உயிரிழந்தாா்.

புதுக்கோட்டை மாவட்டம், இலுப்பூா் அடுத்துள்ள மேல கோத்திராப்பட்டியைச் சோ்ந்தவா் மூக்கையா மகன் வெங்கடேசன்(36). இவா், வெள்ளிக்கிழமை தனது மோட்டாா் சைக்கிளில் வெளியே சென்றுவிட்டு மீண்டும் வீட்டுக்கு சென்று கொண்டிருந்தாா். விராலிமலை அருகே திருச்சி- மதுரை தேசிய நெடுஞ்சாலை மாதிரிப்பட்டி பிரிவு சாலை அருகே சென்ற போது, எதிரே திருநல்லூரைச் சோ்ந்த மாரிமுத்து மகன் கலையரசன் ஓட்டி வந்த மோட்டாா் சைக்கிள் மோதியது. இதில், வெங்கடேசன் தடுமாறி சாலையில் விழுந்தாா். அப்போது, பின்னால் வந்த லாரி வெங்கடேசன் மீது ஏறியது. இதில் அவா் நிகழ்விடத்திலேயே உயிரிழந்தாா்.

தகவலறிந்து வந்த விராலிமலை போலீஸாா் வெங்கடேசனின் சடலத்தை கைப்பற்றி உடற்கூறாய்வுக்காக மணப்பாறை அரசு மருத்துவமனைக்கு அனுப்பி வைத்தனா். மேலும், விபத்து குறித்து போலீஸாா் வழக்குப்பதிவு செய்து விசாரணை நடத்தி வருகின்றனா்.