"உலக வர்த்தக ஒப்பந்தத்தை ஆதரிக்கும் கட்சிகளுக்கு வாக்களிக்கக் கூடாது'

 உலக வர்த்தக ஒப்பந்தத்தை ஆதரிக்கும் கட்சிகளுக்குப் பொதுமக்கள் வாக்களிக்கக்கூடாது என்றார் தமிழ்நாடு வணிகர் சங்கங்களின் பேரவைத் தலைவர் த. வெள்ளையன்.

உலக வர்த்தக ஒப்பந்தத்தை முறியடிக்கக் கோரி, மார்ச் 1-ம் தேதி சென்னையில் தொடங்கிய தமிழ்நாடு வணிகர் சங்கங்களின் பேரவையின் இரு சக்கர வாகனப் பேரணி தஞ்சாவூருக்கு வெள்ளிக்கிழமை வந்தது. இந்தப் பேரணியில் வந்த வெள்ளையன் தஞ்சாவூர் பழைய பேருந்து நிலைய எதிரில் செய்தியாளர்களிடம் கூறியது:

புதிய பொருளாதாரக் கொள்கை என்ற பெயரில் நாட்டை நாசப்படுத்தி வரும் உலக வர்த்தக ஒப்பந்தத்தால், நாட்டில் தரமற்ற பொருள்கள் வெளிவருகின்றன. உடல் நலத்துக்குத் தீங்கு தரும் பொருள்கள் விற்பனை செய்யப்படுகின்றன.

எனவே, உலக வர்த்தக ஒப்பந்தத்தை முறியடிக்க வேண்டும். உலக வர்த்தக ஒப்பந்தத்தை ஆதரிக்கும் கட்சிகளுக்கு சட்டப்பேரவைத் தேர்தலில் பொதுமக்கள் வாக்களிக்கக் கூடாது என்றார் வெள்ளையன். அப்போது, பேரவையின் மாவட்டத் தலைவர் எம். கணேசன், செயலர் முருகேசன், பொருளாளர் ஆத்மநாதன், தஞ்சை நகரத் தலைவர் வாசுதேவன் உள்ளிட்டோர் உடனிருந்தனர்.