அதிராம்பட்டினம் பகுதிக்கு தண்ணீர் திறப்பு

அதிராம்பட்டினம் பகுதியில் வறண்டு கிடக்கும் குளங்களில் நீர் நிரப்ப வலியுறுத்தி, அதிரை கடைமடை பகுதி விவசாயிகள், நீர் நிலை பாதுகாப்பு ஆர்வலர்கள், மீனவர்கள் சார்பில், ஆக. 23 -ல் சாலை மறியல் போராட்டம் நடத்தப்படும் என அறிவிக்கப்பட்டது.
இதையடுத்து, ஆக.21-ம் தேதி பட்டுக்கோட்டை வருவாய் கோட்டாட்சியர் ஐ. மகாலெட்சுமி தலைமையில் நடைபெற்ற அமைதிப் பேச்சுவார்த்தையில், முதல் கட்டமாக ராஜாமடம் கிளை வாய்க்கால் மூலம் அதிரை கடைமடைப் பகுதியிலுள்ள 5 குளங்களுக்கு 20 நாள்களுக்குள் தண்ணீர் நிரப்பப்படும் என அதிகாரிகள் உறுதியளித்தனர்.
அதன்படி, பட்டுக்கோட்டை பொதுப்பணித்துறை அலுவலகம் அருகிலுள்ள ராஜாமடம் கிளை வாய்க்கால்  செவ்வாய்க்கிழமை மாலை 6 மணிக்கு அதிராம்பட்டினம் பகுதிக்கு தண்ணீர் 
செல்வதற்காக திறந்து விடப்பட்டது. 
இந்த தண்ணீர் ஒரு சில நாள்களில் அதிராம்பட்டினம் பகுதியில் வறண்ட குளங்களை சென்றடையும் என பொதுப்பணித்துறை வட்டாரங்கள் தெரிவித்தன.