மாரியம்மன் கோவிலில்  கடையடைப்பு - உண்ணாவிரதம்

தஞ்சாவூர் புன்னைநல்லூர் மாரியம்மன் கோவில் பகுதியில் புறம்போக்கு நிலங்களைக் கைப்பற்ற முயற்சிப்பதாக அரண்மனை தேவஸ்தான நிர்வாகத்தைக் கண்டித்து வணிகர் சங்கப் பேரவையினர் புதன்கிழமை கடையடைப்பு செய்து, உண்ணாவிரதப் போராட்டத்தில் ஈடுபட்டனர்.
புன்னைநல்லூர் மாரியம்மன் கோவில் கிராமத்தில் உள்ள ஆயிரத்துக்கும் அதிகமான குடும்பங்களின் வாழ்வாதாரத்தை அழிக்கும் வகையில், அரசுப் புறம்போக்கு நிலங்களை எவ்வித உரிமையும் இல்லாத அரண்மனை தேவஸ்தான நிர்வாகம் முறைகேடாகக் கைப்பற்ற முயற்சிப்பதாகவும் கண்டித்து இப்போராட்டம் நடைபெற்றது.
இதையொட்டி, மாரியம்மன் கோயில் கிராமத்தில் உள்ள ஏறத்தாழ 160 கடைகள் அடைக்கப்பட்டன. மேலும், அதே பகுதியில் உண்ணாவிரதப் போராட்டமும் நடைபெற்றது.
வணிகர் சங்கத் தலைவர் அன்பு தலைமை வகித்தார். கிராம பொது நல கமிட்டி செயலர் சாகுல்அமீது, வணிகர் சங்கச் செயலர் லாரன்ஸ் உள்ளிட்டோர் கலந்து கொண்டனர்.