வருவாய் துறையில்  காலி பணியிடங்களை நிரப்ப வலியுறுத்தல்

வருவாய்த் துறையில் உள்ள காலிப் பணியிடங்களை நிரப்ப அரசு நடவடிக்கை எடுக்க வேண்டும் என தமிழ் மாநில வருவாய்த் துறை அலுவலர் சங்கம் வலியுறுத்தியுள்ளது.
தஞ்சாவூரில் இச்சங்கத்தின் மாவட்டச் செயற்குழுக் கூட்டம் அண்மையில் நடைபெற்றது. அரசின் நலத்திட்டங்களை மக்களிடம் கொண்டு செல்லும் வருவாய்த் துறையில் காலிப் பணியிடங்களைத் தமிழக அரசு உடனடியாக நிரப்ப வேண்டும். ஏழாவது ஊதியக் குழு நிலுவைத் தொகையான 21 மாத கால ஊதியத்தை உடனடியாக அரசு வழங்க வேண்டும். தமிழக அரசால் அரசுப் பணிகளில் சீர்திருத்தம் என்ற பெயரில் ஆட்குறைப்பு செய்வதற்கு முன்னாள் தலைமைச் செயலர் ஆதிசேஷய்யா தலைமையில் அமைக்கப்பட்டுள்ள குழுவை உடனடியாகக் கலைக்க வேண்டும் என அரசுப் பணியாளர் சங்கங்கள் குரல் கொடுத்து வருகின்றன. இந்நிலையில் அக்குழுவுக்கு மேலும் 6 மாதங்கள் நீட்டிப்பு செய்திருப்பதை உடனடியாக ரத்து செய்ய வேண்டும் என்பன உள்ளிட்ட தீர்மானங்கள் நிறைவேற்றப்பட்டன.
மாவட்டத் தலைவர் ஆர். தங்க பிரபாகரன் தலைமை வகித்தார். துணைத் தலைவர்கள் என். வெங்கடாசலம், ஜி. சக்ரவர்த்தி, பொருளாளர் எம். அய்யம்பெருமாள், செயலர் தரும. கருணாநிதி உள்ளிட்டோர் கலந்து கொண்டனர்.